Matag GKK gitaoran og internet ug monitor

Sanglit limitado ang makaapil sa mga kalihukan sulod sa simbahan sa parokya panahon niining pandemya, gitaoran og mga internet ug monitor ang mga Gagmay’ng Kristohanong Katilingban (GKK) sa Sacred Heart Parish, Obrero, Davao City.

Sa pakighinabi sa Kura Paroko sa maong parokya nga si Fr. Emmanuel “Bong” Gonzaga, siya nagkanayon, “kay dili man makaanhi ang kadaghanan dinhi sa parokya aron pag-apil sa mga kalihukan, gitaoran namo ang mga kapilya sa GKK aron didto na sila makasalmot sa mga kalihukan.”

Kini nahunahunaan sa maong parokya tungod sa daghang mga dili makaapil sa Misa ug uban pang mga kalihukan nga himuon sa sentro tungod sa gipakanaog nga mga health protocols sa panggamhanan ug sa Department of Health.

Dugang ni Fr. Bong nga “didto na sila sa ilang GKK magtigom, magsunod lang gihapon sa protocols sama sa social distance ug didto na sila moapil sa online recollection nga gipahigayon sa DXGN 89.9 Spirit FM.”

Tuod man nakasalmot ang maong mga GKK sa unang hugna sa mga Lenten recollection kon pagpamalandong atol sa Kwaresma. Magpaabot na usab sila nga mosalmot sa ikaduhang hugna karong Marso 22 ngadtosa 25.

Bisan gani sa ilang mga Misa sa parokya sila makasunod na usab gamit ang maong mga giinstalar nga online ug monitor nga mga gamit. Adunay mopakalawat kanila nga mga Lay Ministers atol usab sa maong Santos nga Misa. Kini gituyo aron malikayan ang pagpunsisok sa mga tawo diha sa Parokya.

Garbo ni Fr. Bong nga nakakuha siya og tawo nga makamao ug maayo nga motabang aron mataod kining maong mga gamit. Nagpasalamat usab siya sa mga nitabang aron mapalit kining maong mga gamit lakip na ang pagtampo sa tagsa-tagsa ka mga katilingban.