Visita Iglesia ipasiugda

Andam ka na ba sa Visita Iglesia? Unsaon man paghimo niini taliwala sa pandemya? Asa ba nga mga simbahan ang imong plano nga adtoan?

Tungod sa gipakanaog nga mga health protocols sa atong panggamahan ug Department of Health, ang Arkidyosis sa Davao magpahigayon og Virtual nga Visita Iglesia karong umaabot nga Huwebes Santo sa gabii.

Kining tinuig nga batasan sa mga magtotoo dugokonon sa daghang mga tawo nga mobisita aron mag-ampo atubangan sa giandam nga gi-expose nga Santissimo Sakramento. Apan karong tuiga, niining panahon sa pandemya, himuon kini sa Arkidyosis sa Davao sa virtual nga pamaagi.

Dili gihapon kita mahikawan sa maong naandan nga kalihukan bisan tuod kini dili personal nga pagaapilan kondili gamit ang media. Adunay mga parokya nga andam niini aron maoy bisitahan sa pipila ka oras human sa pagsaulog sa Misa sa Kataposang Panihapon sa Ginoo ug sa prosisyon sa Santisimo Sakramento.

Ang maong virtual nga visita iglesia giandam sa apostolado sa katilingbanong komunikasyon nga gidumala sa Davao Catholic Hereld ug DXGN 89.9 Spirit FM-Davao. Nakaandam na ang mga Simbahan diin kuhaon ang maong kalihukan sa pag-ampo hangtod sa pagsira niini, ilabina sa pagsunod sa mga oras sa curfew.

Sa maong Visita Iglesia, gipahiluna ang mga pag-ampo aron makatabang sa mga mosunod niini. Gihan-ay usab kini uban sa mga musika aron makadugang sa pag-obserbar sa kabalaan sa maong kalihukan.