Pagbag-o tungod sa kasakit ni Kristo

Palm Sunday (March 28, 2021)
Isaiah 50:4-7 / Psalms 22:8-9, 17-18, 19-20, 23-24 / Philippians 2:6-11 / Mark 14:1-15:47

Ang kinabuhi, paghimo sa mga milagro, pagsangyaw sa pulong sa Dios ug labaw sa tanan ang pagpakasakit, kamatayon ug pagkabanhaw ni Cristo, nasayran sa tanang mga tumutuo kaniya, apan ang pagkasayod sa kasaysayan ni Cristo, dili makahimo kanatong tinuod nga Cristyano o sumusunod ni Cristo. Ang kinabuhi ug kamatayon ni Cristo, nakahatag ug dakung kapuslanan sa matag tawo dinhi sa kalibutan tungod kay nagbag-o kini sa tumong sa atong pagkinabuhi, kay nakabag-o kini sa atong relasyon ngadto sa Dios ug sa atong destinasyon sa kinabuhi. Tungod ug pinaagi sa pagkatawo, pagkamatay ug pagkabanhaw ni Jesus, kita nga tawo lamang nahimong mga anak sa Dios, ug nahimong manununod sa gingharian sa langit. Mao kini ang orihinal nga plano sa Dios sa iyang pagmugna sa Kalibutan.

Nahibalo kita nga dili kita angayan sa gipakitang dakung gugma sa Dios kanato. Sa atong paglantaw sa Krus atong makita ang Anak sa Dios diin ang mga kamot ug mga tiil gilansang diha sa kahoy, hinayhinay nga gipatulo gikan sa iyang kasingkasing ang iyang dugo alang kanato. Aduna ba kitay gibati nga nagsud-ong niining larawan? Sama ba kita sa mga Pariseo nga nagyubit kaniya, pinaagi sa atong pagbale wala sa panginahanglan sa uban, pagpakabugnaw sa pagtuo, og ang labing sakit mao ang pagpakasala batok sa Dios, ang dili pagsunod sa sugo sa gugma. Kon balikan nato ang atong mga nangaging kinabuhi, kadaghan seguro kitang nagpadaug sa atong garbo pinaagi sa dili pagpasaylo sa mga nakasala kanato, pagkondenar o paghukom sa binuhatan sa uban, paghikalimut sa atong mga saad sa kaminyoon ug sa Dios, ug uban pa.

Apan samtang aduna kitay mga rason, sa pagbasol sa atong mga nahimong sala ning panahon sa Semana Santa, aduna usab kitay dakung rason nga magmalaumon. Sa kinauyokan sa gibating kasakit ni Cristo, ang atong Ginoo, misiyagit sa halawom nga hangyo ngadto sa iyang Amahan, nga pasayloon ang tanan nga nagdala kaniya sa kamatayon. “Amahan, pasayloa sila tungod kay wala sila mahibalo sa ilang gibuhat” hunong makadiyot, kitang tanan nahiapil niadtong katapusang hangyo ni Jesus ug tungod sa dakung gugma ug kalooy sa Dios ngadto sa iyang bugtong Anak, kita usab nakadawat nianang gugma ug pasaylo.

Ang Semana Santa mamahimong tinuod nga semana nga balaan ug panahon sa pagbag-o sa atong kinabuhi, kon kita maghinolsol sa atong mga sala ug mobalik ngadto sa maayong relasyon ngadto sa Dios. Tinuod isip mga anak sa Dios tungod kang Cristo, dili kita niya pasagdan.