Debosyon alang kang San Jose gipalawman

Sentro karon sa mga kalihukan alang sa pagsaulog sa Tuig ni San Jose mao ang parokya sa St. Joseph the Worker sa Sasa nga maoy gitudlo ni Arsobispo Romulo G. Valles, D.D.

Gibutyag ni Rev. Fr. Leonardo “Bong” Dublan, Jr. nga sukad Pebrero 15, gisugdan sa parokya ang pagpalawom sa debosyon ug pag-ila kang San Jose pinaagi sa paghimo sa 33 ka adlaw nga paghisgot ug sa mga mithi ni San Jose nga matapos sa Marso 19, 2021, ang Solemnidad ni San Jose, Esposo ni Maria isip ikaduha nga patron sa parokya.

Sa gihimong pakighinabi pinaagi sa zoom sa programang Kasikas, adlawng Martes, Marso 2, midugang si Fr. Dublan nga atol sa maong adlaw, pagahimoon ang Konsagrasyon alang kang San Jose sulod sa Santos nga Misa sa alas 6:30 sa buntag.

Gawas pa niini, ilusad usab sa maong adlaw ang Hot Meals on Wheels kon ang paghatag ug pagkaon ngadto sa mga kabus nga anaa sa mga kadalanan nga maoy proyekto nga gipanguluhan sa Ministriya sa Social Action sa parokya.

Andam na usab ang parokya sa St. Joseph the Worker sa pagdawat sa mga dumuduong nga mga deboto ni San Jose nga mobisita sa ilang parokya kinsa nanginahanglan ug pagkumpisal ug pagtambong sa Santos nga Misa. “Gidasig namo (sila) nga moanhi sa adlawng Huwebes kay mao kana ang St. Joseph’s Day dinhi sa parokya,” si Fr. Dublan midugang.

Alang sa mga organisado nga maghimo sa pilgrimage kon panaw-duaw, gidasig ni Fr. Dublan ang pag-kontak usa sa ilang parish office aron nga maandam ang ilang mga gikinahanglan nga mga serbisyo sama sa pinasahi nga Santos nga Misa, pagpamalandong, ug uban paggamit sa mga pasilidad.

Sa laing bahin, daghang mga indulhensiya ang mamahimong madawat sa mga mag-ampo alang kang San Jose nga gitagana sa Vatican gawas pa sa mga grasya nga madawat sa selebrasyon sa 500 Years of Christianity.

“Ang regular nga buuhaton sa indulhenisya, una pagkumpisal, pagsimba ug pag-ampo sa intensyon sa Santo Papa ug sa Tuig ni San Jose, duna pay laing duha nga pamaagi sama sa pagpamalandong sa Amahan Namo, sa pag-apil sa spiritual retreat sulod sa usa ka adlaw nga naglangkob sa pagpaamalandong labot kang San Jose, ug paghimo sa buhat sa kalooy,” si Fr. Dublan nagkanayon.

Mamahimong moapil sa Virtual ug On-air Recollection sa DXGN 89.9 Spirit FM kalabot kang San Jose nga ihatag ni Most Rev. Ronald Lunas, D.D., Obispo sa Diocese sa Pagadian sa tema nga “St. Joseph and Family, Gifted to Give sa Marso 10, 2021, alas-7 sa gabii.

Gawas pa niini, si Fr. Dublan midugang, mamahimong himoon ang mga pag-ampo diha sa sulod sa panimalay sa matag pamilya, sa magtiayon o sa mga manag-uyab, ug ihalad ang mga pag-ampo sa pagka-amahan, pagka-pamilya, o ang mga trabaho sa mga magbabaul—mga mithi nga anaa sa karakter ni San Jose.