Ang saad sa paghigugma

Gisaulog niadtong Pebrero 14, 2021 sa St. John Paul II Sub-Parish ang pinalahi ug pina-espesyal nga selebrasyon niining adlaw sa gugma pinaagi diha sa pagsaksi sa “renewal of marriage bonds” sa kapin 30 ka parisan nga magtiayon.

Mao kini ang unang higayon nga gimugma sa St. John Paul II Sub-Parish alang sa kalihokan sa Valentine’s Day.

Pinangulohan sa mga Rogationist Fathers nga sila Fr. Ruel Desamparado ug Fr. Rey Villamonte uban sa abag ni Fr. Carlo Balaguer, malampusong gisaulog ang santos nga misa sa alas-10 sa buntag alang niining aktibidad.

Espesyal kini alang sa mga magtiayon tungod sa sakramento sa kaminyuon apan mas espesyal kini sa simbahan tungod aduna kini lawom nga tumong nga mao ang pagtabang sa pagpatukod og comfort rooms (activity for a cause) alang sa katawhan.

“Samtang nagtan-aw ako ninyo pasulod sa simbahan natandog ako ug kahilakon tungod kay nakita ko ninyo ang gugma usab sa akong mga ginikinan, ang hinungdan kun ngano ako ania karon dinhi. Ang gugma ngano usab kami nangahimong mga pari,” sigun ni Fr. Ruel diha sa pagsugod sa misa.

“Si Kristo Diyos sa gugma, Diyos sa kaluoy ug Diyos sa kahimtang. Puy-an unta ninyo ang inyong kaminyuon diha sa kinasingkasing og dili sa singkasingka. Magpabilin unta kamo diha sa grasya sa Diyos. Walay commitment nga magpabiling lig-on kundili ubanan sa mga pag-ampo,” matud ni Fr. Rey diha sa iyang homiliya. (SUGID SoCCom)