Lima ka tuig balik-misyon, lima ka tao sa tag-singkwenta nga donasyon

Gilusad gahapon, Pebrero 13, ang proyekto nga gitawag: Lima ka tuig balik-misyon, lima ka tao sa tag-singkwenta nga donasyon.

Isip pagsaulog sa umaabot nga ika-lima ka tuig na karong Hunyo 13 sukad sa pag-abli pag-usab sa DXGN 89.9 Spirit FM-Davao, namugna kining maong proyekto sa tuyo nga masuportaan ang pagpadagan ug mga galastuhan sa atong pagsibya sa radyo sama sa 100,000 ka libo ka pesos nga gikinahanglan sa kuryente matag bulan.

Pinangulohan ni Mary Ann Almeria, Events and Promotions Coordinator, ubos sa pagpanguna ni Melrica Campos, Marketing Head sa DXGN 89.9 Spirit FM, gihagit ang tanang mga magtotoo nga mamahimong kabahin sa misyon sa pagpalapnag sa Maayong Balita pinaagi sa radyo.

Sanglit dili man tanan mamahimo ug dunay talento nga mosulti sa radyo, pamahayag ni Mary Ann Almeria nga, “ang matag usa giawhag nga makahatag sa ilang suporta nga pinansiyal pinaagi sa pag-agni og kaubanan aron mohatag sa tag-singkwenta pesos sugod Pebrero 13 hangtod Hunyo 13.”

Atol sa panagtigum nga virtual sa mga volunteer anchors ug SoCCom (Social Communications Committee) sa mga parokya sa Arkidyosis sa Davao niadtong Pebrero 9, mihagit si Mary Ann nga, “Sulod sa 120 ka adlaw nga kampanya gilauman nga 50,000 ka mga magtotoong tigpaminaw ang makahatag bisan kausa lamang isip pagkinabuhi sa tinuoray sa tema nga ‘Gifted to give’ sa ika-500 nga kasumaran sa Kristiyanismo sa nasod.”