Kalibotanong adlaw sa masakiton, gihatagag gibug-aton

Subay sa circular letter numero 5, series of 2021, nga gipagula ni Arsobispo sa Davao ug CBCP President, Most Rev. Romulo G. Valles, D.D., gihatagan na usab og gibug-aton ang adlaw sa mga masakiton sa tanang mga pagsaulog sa liturhiya sa tanang mga parokya sa Arkidyosis sa Davao.

Tinuig nga ginasaulog matag Pebrero 11, gipahigayon ang mga liturhiya sa kapistahan sa Birhen sa Lourdes nga dunay pagbatbat sa kaimportansiya sa maong kasaulogan. Gisalig usab sa katawhan ang panabang sa Mahal nga Birhen kinsa daghang mga milagro sa kaayohan ang nahimo sa katawhan.

Sa iyang homiliya atol sa piyesta sa Parokya sa Birhen sa Lourdes, Bangkal, gihagit ni Fr. Henry Campeon, Kura Paroko, ang mga parokyano sa pagbaton sa pagsalig sama sa Birhen ug Inahang Maria ilabina niining panahon sa pandemya.

Sa naasoy nga circular usab, giawhag ni Arsobispo Valles ang gipahigayon nga Mass in time of the Pandemic niadtong Pebrero 12. Gituyo kini nga himuon tungod sa panginahanglan sa panahon nga mangayo kitag panabang ug panalipod aron kita malingkawas ug mamaayo sa giatubang nga hulga sa COVID 19.

Ang maong liturhiya gikan pa gayod sa Vatican. Sa maong mga pag-ampo gipangayo ang kalooy sa Dios alang sa mga nasakit, kapahulayan sa kalinaw sa mga nangamatay, kahupayan sa mga nagsubo, kalig-on sa mga lumilihok sa mga balay tambalanan, kaalam sa mga lideres ug gugma nga motabang sa usa’g usa.