Ipadan-ag Ang Kahayag

Ikatulong Dominggo sa Ordinaryong Panahon

Is. 8:23-9:3 / Ps 27:1. 4. 13-14/ 1Cor 1: 10-13. 17 /

 Mt. 4:12-23

        Sa panahon sa pagkatawo sa Ginoo, miabot ang kahayag. Sa panahon sa iyang bunyag nga atong gisaulog niadtong milabay nga Domingo midan-ag ang langit uban sa pag-angkon kaniya nga pinalanggang anak. Ang salampati nga nagsimbolo sa Espiritu naghayag kaniya sa iyang misyon.

Niining ikatulong Domingo sa Ordinaryong panahon, si Kristo nagdasig kanato pinaagi sa iyang panig-ingnan sa pagpatuman sa plano sa Dios. Kini iyang gihimo diha sa pagsangyaw sa paghinulsol sa yuta sa Galilea. Iyang gidapit ang katawhan sa pagpuyo sa paghari sa Dios. Aron matuman kini siya mitawag og mga tawo nga maoy motabang kaniya sa pagpakaylap niining maayong balita.

Siguro, unang gihagit ang matag-usa kanato sa paghinulsol ug pagbalik ngadto sa Dios. Kung atong dawaton ang atong mga sala, gidawat nato ang paghari sa Dios ug dili na ang atong mga kahuyang sa sala. Sa dili pa kita mahimong iyang pinadala kinahanglan usab nato dawaton ang pagpuyo sa kahayag ni Kristo. Kana mahitabo kung kita moangkon nga kita nakalapas kaniya ug andam nga magbag-o.

Ikaduha, dili lamang kita magpabilin nga personal nga dunay relasyon sa Ginoo. Gitawag usab kita human mabag-o sa pag-ambit sa iyang misyon sa pagpakaylap sa iyang dakong gugma. Kinahanglan mogawas kita sa kaugalingong kaharuhay ug moambit sa misyon ni Kristo. Tubagon nato ang iyang tawag sa pagkuyog kaniya aron makakabig kita sa atong isigkatawo ngadto sa Dios.

Niining kalibutan karon nga gisakit sa mga katalagman ug mga kahuyang sa tawo, kita unta personal nga mabag-o. Kita unta maghinulsol dili tungod sa kahadlok kondili tungod sa kahayag nga miabot, si Kristo ang mahigugmaong manluluwas. Ug human kita nakasinati sa iyang gugma, unta kita usab mamahimong instrument sa iyang kahayag. Kita unta mopadayon sa paglakaw uban kaniya aron ipadan-ag ang iyang kahayag.