Bag-ong Hepe ug Estasyon sa Kapulisan Abli sa Pagtabang

Abli sa pagtabang sa katawhan ang bag-ong cuerpo sa kapulisan nga nahimutang sa Ecoland, kon ang Police Station 15.

Sa gihimong pakighinabi tali sa hepe sa PP 15, P/Major Carol Jabagat sa programang AMBIT GN sa DXGN 89.9 Spirit FM adlawng Miyerkules, iyang gibutyag nga giadto nila ang mga purok ubos sa ilang area of responsibility alang sa pag-edukar kon pagpasabot sa katawhan kalabot sa pagsunod sa mga balaod kon health protocols batok COVID-19 ug ingon man kabahin sa druga ug batok sa pagpang-abuso sa kababayen-an ug ilang kabataan kon Violence Against Women and Children (Republic Act 9262).

“Siyempre naa tay community services… so nagagawas ang atong kapulisan pwedeng maghatag ug flyers ug lectures, dili lang ta dakop puro; … we have to ask the community to work with us… aron nga malikayan nila nga maka-disobey sila sa atong balaod,” si P/Major Jabagat nagkanayon.

Pormal nga naablihan ang PS15 niadtong bulan sa Oktubre sa milabay nga tuig kansang area of responsibility naglangkob sa Ecoland, Matina Aplaya kutob sa Lots for Less, ug Matina Gravahan.

Siya midugang nga prayoridad nila karon mao ang pagpatuman sa balaod sa IATF batok COVID-19 ingon man batok sa druga ug sa pagkampanya sa culture of security.

Usa sa mga problema nga ilang na-enkwentro mao ang pagpatuman sa VAWC sanglit sa kadaghanan dili motunhay ang kaso nga ilang mahuptan tungod sa kahuyang sa kasingkasing sa kababayen-an nga maluoy sa gipasakaan ug sumbong ilabi na kung ila kining mga bana.

Tungod niini, gipadayon sa mga sakop sa kapulisan ubos sa PS15 ang pakigdayalogo o pagpasabot sa katawhan kalabot sa balaod sa VAWC.

Busa giawhag ni PMaj. Jabagat ang katawhan sakop sa ilang AOR nga moduol kanila kung nagkinahanglan kalabot niini o sa bisan unsang suliran sa kahapsay ug kalinaw pinaagi sa pagtawag o pag text sa ilang hotline nga cellphone number 09070370785.