Pamilya ang misyonero sa pamilya

Ang tinuig nga pagsaulog sa Pro-life month kon bulan alang sa kinabuhi sa tibuok Pebrero, giablihan na karong Domingoha, Enero 31. Kini makahatag og igong panahon nga sugod ugma dayon, Pebrero 1, mamahimo nang modagayday ngadto sa mga pamilya diha sa Gagmay’ng Kristohanong Katilingban ang mga gipanglatid nga mapadayunong programa niining maong apostolado.

Kini gipasiugdahan sa Family and Life Apostolate sa nagkadaiyang lokal nga Simbahan sa Pilipinas. Uban ni Fr. Orly Angelia, Director sa maong apostolado sa Archdiocese sa Davao ug Rector sa St. Francis Xavier College Seminary, ang maong apostolado padayon nga nag-andam sa mga kalihukan kalabot sa pagpalig-on sa pamilya ilabina taliwala niining krisis nga atong giatubang karon.

Sa senimana nga programa nga Kahayag sa Pamilya sa DXGN 89.9 Spirit FM, si Fr. Orly mihagit nga unta “lig-onon ang pagtoo diha sa pamilya, puy-an ug ipaambit kini.” Atubangan sa hagit sa social media nga dako kaayo ang epekto ug impluwensiya sa mga kabataan karon, iyang nakita nga kinahanglan maningkamot ang matag pamilya sa pagharong niining hagit sa misyon.

“Ang pamilya maoy misyonero sa pamilya,” dugang ni Fr. Orly isip pamalandong sa tema sa ika-500 na nga tuig sa atong pagka-Kristiyano dinhi sa Pilipinas. Iyang gipasabot nga ang pamilya nga nasangyawan sa pagtoo mao usab ang adunay tulubagon sa pagsangyaw sa pulong ngadto sa uban.

Sa maong programa sa DXGN 89.9 Spirit FM atol sa kasaulogan sa Domingo sa pulong sa Ginoo iyang nahinumdoman nga sa didto pa siya nadestino sa parokya sa Sacred Heart sa Oberero, adunay miduol kaniya nga usa ka amahan nga mipaambit nga sila sa iyang pamilya nagtigom uban sa iyang mga anak aron pag-inambitay sa pulong sa Ginoo gamit ang Bibliya.

Sukad niadto wala na siyay laing nadungog nga nagkomentaryo nga miduol kaniya nga naghimo sa susamang kalihukan sa pamilya. Mao nga gihagit niya ang mga naminaw nga unta “aduna pay ikaduha o ikatulo nga amahan nga maghimo sa maong Bible sharing uban sa iyang mga anak diha sa ilang pamilya.”

Ang tema niining kasaulogan sa Pro-Life month karong tuiga mao: “Buhay at Pamilya: Sandigan sa Panahon ng Pandemya.”