Unang Parish Family Days sa St. Francis of Assisi Quasi-Parish Malampusong Gipahigayon

Gipahigayon ang unang Parish Family Day nga gilangkuban sa 15 ka mga Gagmayng Kristohanong Katilingban dinhi sa Parish Church niadtong Dec. 29, 2013, Domingo, human sa santos nga misa, alas 8:30 hangtud sa alas 2:30 sa hapon. Ang panagtapok adunay kalambigitan sa selebrasyon sa kapistahan sa Sagrada Familia busa ang tema nagkanayon “Pamilya Nga Maampoon, Pamilyang Malamboon”.

Ang unang bahin, mao ang faith sharing sa mga miyembro sa pamilya nga mipaambit sa ilang mga kristohanong kasinatian diha sa pamilya, katilingban ug simbahan.  Adunay carolling contest nga mao na usab ang nagsilbing pasundayag sa matag GKK. Nindot ang mga kanta hilabina ang mga karaang Cebuano nga panaygon.  Si Mr. Ammel Baculna, Archdiocesan Coordinator on Liturgical Music ang nahimong chairman sa mga hurado, uban ni Mr. Rolly Calixtro, magtutudlo sa Bernardo Carpio National High School ug usa pa hurado.

Human sa contest nag-ambitay usab sa Agape (Lunch) ang mga Parokyano sa ilang mga pwesto sa gawas ilawom sa tulda samtang nagpaabot sa resulta sa mga mananaug. Adunay mga trivia nga pangutana ug sa matag saktong tubag sila nakadawat ug mga pahalipay nga grocery goods ug rosaryohan. Ang pinakamahinungdanon ug pinakanindot nga pangutana nga nadaugan sumala pa ni Fr. Orly mao ang pinakadaghan nga miyembro sa pamilya nga nitambong sa Parish Family Day. Ang nakadaug mao ang pamilya ni G. Eladio Cabonilas, PSL sa St. Vincent GKK. Ang ilang pamilya gilangkuban sa tulo ka henerasyon: (Siya nga usa ka amahan/lolo ug iyang asawa/lola; Ang iyang anak nga lalaki, ang asawa niini, ug ang ilang mga anak/nga mga apo ni manong Eladio.

Ang katapusang bahin sa programa mao ang pagpanghatag sa premyo sa mga mananaug sa Carolling Contest: GKK sa St.Francis of Assisi (1st Prize), San Lorenzo Ruiz (2ndprize) ug St.Vincent (3rd Prize). Ang tanan GKK nga wala nakalugar adunay nadawat nga consolation prize nga tag (P500)  ang San Jose, Davao Empress nakadawat ug dugang pahalipay kay sila ang adunay pinakadaghan ug partisipante.  Ang mga mananaug sa Christmas lantern mao sila Mr.Engelbert Kintanar sa St. Francis of Assisi (1st Prize), GKK sa St.Vincent (2nd Prize) ug Sto.Nino-GKK, Diamond Village (3rd Prize).  Nakadawat gihapon ug consolation prize ang mga wala nakalugar.

   Sa katapusan, gipasalamatan ni Fr. Orly ang tanang nitambong hilabina kadtong nagsponsor sa mga premyo, ug ang nagdumala sa programa nga gipangulohan ni Bro. Joseph Uy lakip usab ang grupo ni Bro. Frem Grabato sa Couples For Christ, ug ang mga miyembro niya sa C-1. Sa tanang parokyano ang dili maihap ug masukod nga pasalamat hangtud sa sunod nga Parish Family Day!!!