Bag-ong tuig, bag-ong mga pari

Doble ang pag-amping sa pagpangandam ug pagpahigayon taliwala sa hagit sa pandemya sa misugat sa bag-ong tuig nga 3 ka mga bag-ong pari sa Arkidyosis sa Davao nga giordinahan Enero 6 ug 9, ug sa Enero 11 niining tuiga.

Kining 3 ka mga gasa sa Simbahan mitapos sa ilang pagtuon sa Teyolohiya sa St. Francis Xavier Regional Major Seminary sa Catalunan Grande, Davao City. Human sa ilang ordinasyon sa pagkadiyakono, nadestino sila sa nagkalain-laing parokya ug buluhaton dinhi sa Arkidyosis. Silang 3 giordinahan sa pagkadiyakono niadtong Septembre 2, 2019 ug giordinahan sa pagkapari sa ila mismong lugar nga gidak-an.

Si Fr. Alfredo Bustamante, Jr. nga natawo niadtong Hunyo 28, 1990 giordinahan sa St. James Parish, Bunawan niadtong Enero 6, 2021. Si Fr. Michael Ondras nga natawo niadtong Hulyo 12, 1991, naordinahan sa Immaculate Conception Parish sa Mintal niadtong Enero 9, 2021. Ug si Fr. Ruperto Jamili nga natawo niadtong Disyembre 10, 1983 ordinahan sa Most Sacred Heart Parish sa Calinan karong Enero 11, 2021.

Bisan pa man sa krisis, padayon ang Ginoo nga nagpadala kanato og mga magsasangyaw sa iyang mahigugmaong presensiya.