Nakita namo ang iyang bituon

Solemnidad sa Epipaniya sa Ginoo (January 3, 2021)
Is. 60:1-6 / Sal. 72 / Eph. 3:2-3 / Mt. 2:1-12

Nakasinati kita sa kangitngit nga dala niining krisis sa COVID 19. Kangitngit nga dala sa kahadlok tungod sa pagtapot sa maong sakit. Kangitngit tungod sa kabalaka kay wala nay trabao o kapaninguhaan. Kangitngit tungod sa kamatayon sa mahal sa kinabuhi, ug uban pa.

Apan makita unta nato ang kahayag ug kalipay sa pagkatawo sa Ginoo nga maghupay kanato sama sa gisulti ni Propeta Isaias. Makahupay ang makita natong kahayag diha sa mga tawo karon nga bisan sa kahimtang sa krisis naningkamot gihapon nga adunay mabitbit ug mapalit aron makahatag sa uban. Sa bisan gamay nga kapaninguhaan, daghan ang nangitag pamaagi nga makahatag gihapon isip pagpadayag sa kalipay sa Pasko sa pagkatawo sa Ginoo.

Sa sulat ni Pablo ngadto sa mga taga Efeso, nagpadayag ang Ginoo sa iyang tinago kaniadto. Karon padayon kitang mosusi sa maong pagpadayag sa iyang dakong gugma. Niining pandemya nga atong nasinati, daghan kanato nakaamgo sa mga pagpadayag sa Ginoo nga dili diay kita makasalig sa mga lumalabay nga butang. Kaniya lamang gayod kita makasandig kay siya magpabilin sa kanunay nga dili mobiya kanato. Bisan daghan pa kitag mga pangutana kung unsa man gayod ang kahulogan ug mensahe niining maong pandemya, padayon unta kitang magpalalom sa atong pagpamati sa mensahe sa gugma sa Dios taliwala niini.

Sama sa mga tawong maalamon, mohangad kita sa kahayag ug lamdag sa Ginoo. Mopadayon kitang maglakaw bisan sa kangitngit uban sa pagsalig sa bidlisiw sa Diosnon nga giya. Dili unta kita madala sa ubang pag-ingganyo nga kalibutanon ug lumalabay nga nagpahimulos lamang sa kalisod sa mga tawo karon, kondili magmalig-on nga molahutay sa bituon sa maayong buhat aron usab makalamdag ngadto sa uban diha sa ilang kangitngit. Kung ang matag usa motugot sa bituon sa kaayo bisan ginagmay nga buhat, mosanag gayod ang atong dalan ug makaabot kita sa paghimamat sa atong Manluluwas.

Diha sa paghupay sa usa’g usa, sa padayon nga pagpamalandong sa matuod nga mensahe sa Ginoo taliwala niining pandemya ug sa pagpadan-ag sa bituon sa maayong buhat, mahanaw ra ang kangitngit nga nasinati nato karon.