Pagpakasama Sa Mga Bata Piyesta sa Sto. Niño

(Is. 19:1-6/ Ps. 97:1-6/ Eph. 1:3-6, 15-18/ Mt. 18:1-5, 10)

“Gawas kon mausab kamo ug mahimong sama sa mga bata, dili gayod kamo makasulod sa Gingharian sa langit.” Unsa diay ang mga kinaiya o taras sa bata nga angay huptan aron kita makasulod sa Gingharian?
Una, ang bata abli sa pagtulon-an. Tungod sa kakulang sa kahibalo, ang bata dali matudloan. Mao gani nga amping kita kinsay gikauban ug unsay ginatan-aw sa bata aron dili maimpluwensiyahan sa dautan. Siya dali moawat ug mosundog. Kung kita andam pud mosunod sa gitudlo ni Kristo pinaagi sa atong Inahan nga Simbahan, sayon kanato pagsulod sa Gingharian. Kung mobuhat kita sa panig-ingnan ni Kristo sa pag-alagad sa uban, dili layo kanato ang Gingharian. Ang Dios nga nagsilot sa mga Ehiptohanon mas nakahibalo unsay makaayo kanato.

Ikaduha, ang bata puno sa pagsalig. Tungod sa kakulang sa gahum, siya puno sa pagsalig. Malipay siya nga kauban ang iyang papa o mama kay mabati niya nga adunay mag-atiman kaniya. Kay daghan siya’g dili kayang buhaton, siya mosalig sa kaayo sa uban. Magbaton usab unta kita sa pagsalig sa Dios. Ang “ballpen” wala masayod unsay isulat sa naggamit kaniya ug ang “brush” wala masayod unsang larawan ang himuon sa usa ka “artist”, mosalig unta kita sa Dios nga mopintal sa atong kinabuhi. Duna kitay Dios nga gamhanan nga naghatag kanato’g kaalam ug pagsabot sa Iyang gipadayag.

Ikatulo, ang bata dali makapasaylo. Bisag dali siyang makakita og away tungod kay nag-ilog sa dulaan o pagkaon, layo kaniya ang pagdumot. Makadawat dayon siya ug makapasaylo sa iyang higala. Kini usab unta atong maangkon – ang pagdawat sa mga tawo ug kasinatian bisan sakit palandungon. Padayon unta kita sa gaan nga panaw ug dili maluya sa pagkulang sa uban. Duna kitay Dios nga mapasayloon ug madawaton kanunay.

Sa pagsaulog nato sa pista sa Sto. Niño, atong gisaulog ang adlaw sa balaang pagkabata. Giawhag ang mga ginikanan ug mga matutudlo sa pagpasabot sa mga kabataan sa kaikag ug debosyon sa misyon. Ang mga bata atong dasigon sa pag-ampo, pagbuhat og maayo ug paghalad og sakripisyo.