Pinakaunang National Catholic Media virtual Convention giablihan

Giablihan ang pinakaunang National Catholic Media virtual Convention subay sa tema “Real Talk” nga gibase sa mensahe ni Santo Papa Francisco sa pagsaulog sa World Communications Day niining tuiga, Nobyembre 23.

Gisalmotan kini sa nagkadaiyang social communication practitioners sa mga dioceses kon lokal nga mga simbahan sa tibuok nasud sa Pilipinas.

Gidumala kini sa Episcopal Commission on Social Communications kon ECSC sa Catholic Bishops’ Conference of the Philippines uban ni Most Rev. Marcelino Antonio Maralit, Jr., chairman sa ECSC ug Obispo sa Boac, Marinduque.

Gisaysay ni Arsobispo Romulo Valles, Presidente sa Catholic Bishops’ Conference of the Philippines ug Arsobispo sa Davao, sa iyang welcome address, ang iyang kasinatian sa kaimportansiya sa Social Communications niining panahon sa pandemya.

Matud ni Arsobispo Valles, aron mahimong Real Talk ang pagpaabot sa pagsaysay sa estorya alang sa mga Catholic communicators kinahanglang ang tulo ka butang: una, ang presensiya atol sa panghitabo; ikaduha, ang sinseridad ug kamatinud-anon sa presko nga pagsaysay; ug ikatulo, ang paghatag og paglaum sa kaayo sa Ginoo taliwala sa mga subo nga panghitabo.

Kahinumdoman nga ang Archdiocese sa Davao maoy host niadtong ikaupat nga National Catholic Media Convention sa tuig 2018. Apan karon gihimo nga virtual tungod sa atong kahimtang niining pandemya.