Unang annual retreat sa mga kaparian gibulag

Sa unang higayon nagbulag ang mga kaparian sa Davao sa ilang tinuig nga retreat kon pamalandong. Kini tungod sa kalisod ug paglikay sumala sa executive order sa mga awtoriadad sa dagkong tigum panahon niining COVID-19.

Sa milabay nga mga katuigan kanunay nga naghiusa ang mga kaparian sa maong retreat sa bisan asang lugar nga kini ilang ikasabot nga ipahigayon. Gani dili sayon ang panaghisgot sa milabay nga mga tuig tali sa mga opinyon sa mga kaparian nga unta bulagon bisan sa duha lamang ka grupo tungod sa kadaghan ni niini. Apan lisod huna-hunaon nga sila bulagon sumala pa, tungod kay naanad sila nga mag-uban kanunay.

Tungod niining pandemya, walay daghang estorya ang gikinahanglan, kondili ang paghimo sa maong retreat pinaagi sa Vicariates. Nag-uban ang mga vicariates sa San Pedro ug Santo Rosaryo didto sa Digos, ug ang Vicariates sa San Pablo ug Sacred Heart sa Island Garden City of Samal, samtang ang Sta. Ana ug Saint James sa lain-laing lugar usab sa Mati, ug sa Eden Nature Park ang grupo sa mga nadestino sa seminaryo.

Mas suod tungod sa kagamay sa grupo ang kasagaran nga nasinati sa maong retreat. Nakab-ot gihapon ang tumong uban sa laing-laing mga sharers ug speakers sa matag grupo. Basin sa sunod tuig mahimo gihapon nga managbulag ang maong naasoy nga retreat sigon sa panginahanglan ug ikatabang niini.