Paglipay ug pagmaya

Solemnidad sa Tanang Mga Santos (November 1, 2020)
Gip. 7:2-4, 9-14 / Sal. 24:1-6 / 1 Jn. 3:1-3 / Mt. 5:1-12

Paglipay ug pagmaya kon Gaudete et exsultate sa sinultian nga Latin. Kini ang titulo sa sulat-apostoliko ni Santo Papa Francisco nga gipagula niadtong Marso 19, 2018.

Iyang gisaysay ang bokasyon sa matag usa sa pagkasantos ug pagkabalaan. Dili lamang ang mga pari ug Obispo o mga madre ug relihiyoso ang gitawag sa pagkabalaan ug kasantos, kondili ang matag usa kanato.

Kanus-a man nato masinati ang kalipay ug pagmaya?

Diha sa kakabos diin naghari ang pagsalig sa Dios ug dili sa mga butang lumalabay kay ang tanan molabay u gang Dios lamang ang magpabilin kanunay.

Dihasa sa pagpaubos ug dili sa pagpataas ug garbo kay dili gayod mahitabo nga kita kanunay molabaw ug nga walay molabaw kanato.

Diha sa pagdawat sa kasubo nga puno sa pag-ambit sa makahupay nga kasakit ni Kristo ug dili ang pagtalikod sa mga kasakit nga masinati ning kalibotan kay kabahin gayod kini sa kinabuhi.

Diha sa paglahutay sa kamaayo bisan sa kagutom ug dili sa kanunay nga kabusog ug abundansiya.

Diha sa pagkamaloloy-on nga motabang ug mosabot sa mga huyang ug dili ang paghukom sa uban.

Diha sa pagkaputli og kasing-kasing nga mahigugma ug dili ang pagtinguha sa kadaot sa uban.

Diha sa pagpaningkamot sa pakigdait ug dili ang pagpangitag kagubot ug kaguliyang.

Diha sa pagharong sa pagpaglutos tungod sa pagtinguha sa kaayo ug dili sa pagpangita lamang sa unsay sayon.

Kung kini atong mapuy-an maglipay ug magmaya gayod ang atong kauglingon sa kanunay. Kung kita makapuyo niini, mabalaan ug masanto nato atong kaugalingon kay ang kalipay ug kamaya mao man ang kahulugan sa pagkabalaan ug pagkasantos.