Ihatag ang angay

Ika-29 nga Domingo sa Ordinaryong Panahon (October 18, 2020)
Is. 45:1, 4-6 / Sal. 96 / 1 Thes. 1:1-5b / Mt. 22:15-21

Motoo ka ba nga ang matag pangulo o lider pinili sa Dios? Motoo ka ba nga ang matag pangulo o lider gipili gikan sa membro o sakop sa katilingban?

Ang pangutana nga nadungog ni Hesus nga gitawag nilag Matutudlo usa ka lit-ag o bitik. Siya ilang gibitik kung siya uyon ba o supak sa nga nangulo o panggamhanan niadtong higayona, mga pangulo ug panggamhanan sa gobyerno ug relihiyoso. Ang kanhi nga nagkaaway nga pwersa sa gobyerno ug relihiyosong sektor nagkahiusa niining bahin sa panahon sa Ebanghelyo tungod kay buot nila nga bungkagon ug gun-ubon ang nagkaanam nag kalig-on nga mga sumusunod ni Hesus.

Kung si Hesus motubag nga dili supak ang pagbayad sa buhis sa Emperador sa Roma, ang mga sumusunod ni Herodes mopasakag sumbong batok kang Hesus. Ug kon siya moingon nga dili supak sa balaod ang pagbayad og buhis sa Emperador, ang nga Pariseyo maoy mopasakag sumbong batok kaniya nga si Hesus uyon sa pagpanlupig sa panggamghanang Romanhon sa mga Pariseyo. Nan, wala siya lusot. Mao ng siya mitubag nga ihatag sa Emperador ang iya sa Emperador ug sa Dios ang iya sa Dios.

Wala siya nalit-ag kay ihatag man diay sa hataganan ang unsay angay. Ihatag sa gobyerno ang respeto nga gikinahanglan. Ihatag usab sa Dios ang pagsimba nga gikinahanglan. Kini ang gisulti diha sa una ug ikaduhang pagbasa nga ang matag pangulo o lider gipili ug gipanahalingan gayod sa Dios. Ang matag pagpangulo sa gobyerno man o sa simbahan gimbut-an sa Dios aron mahapsay ug maalagaran ang mga nanginahanglan.

Ang tinuod nga paagi sa pagahatag respeto ug pagtamod sa mga pangulo mapakita sa matag membro o sakop pinaagi sa pagbuhat usab sa iyang kaugalingon nga katungdanan ug dili lamang ang pagpaabot nga siya alagaran. Ang matag usa kanato unta maghuna-huna unsay iyang ikahatag o mahimo nga maayo alang sa katilingban ug kadaghanan inay nga magpaabot lamang o manaway sa mga pangulo ug lider. Isip sakop ug membro sa katilingban mas mahatagan nato ug himaya ang Dios kung ang matag usa mohimo sa iyang responsibilidad alang sa kaayohan sa tanan.