Sinulog sa Kaputian Ipahigayon

Ang Sto. Niño Parish sa Kaputian, Island Garden City of Samal magpahigayon sa unang Sinulog Festival isip pagsaulog sa kapistahan sa parokya karong Enero 19.

Ang Sinulog sa Kaputian 2014 binase sa inila nga Sinulog Festival sa Sugbu ug kini gihimoan og lokal nga pamaagi sa pagsaulog didto sa syudad sa Samal.

Subay sa tema: “Ang Dili Modawat sa Paghari sa Dios Sama sa Usa ka Bata Dili Mahisakop Niini.” (Mark 10:15), ang kasaulogan sa Sinulog himoon gihapon nga sadya nga paagi sa pagpakita sa kultura sa Pilipino pinaagi sa sayaw, musika ug singgit isip pasidungog sa Batang Hesus.

Sumala sa kura paroko nga si Fr. Rico Enriquez, ang Sto. Niño Parish maoy usa sa organizer sa Sinulog Festival Dance 2014 nga abri alang sa 12 ka distrito sa parokya diin 30-40 ka mga miyembro sa GKK ang maoy kabahin sa matag grupo.

Walay age limit nga gihatag apan kining maong kumpetisyon alang lamang sa mga Romano Katoliko ug gidili ang pag-apil sa mga adunay problemang medical.

Sa bisperas sa adlaw sa kapistahan sa parokya, ang mga muapil sa kumpetisyon kinahanglan mutambong sa prusisyon ug Misa.

Ang mga mudaug makadawat sa mga premyo: Champion, P5,000; 1st runner-up, P 3,000; 2nd runner up, P 2,000 ug consolation prize nga P 1,000 matag grupo.