Pahalipay sa Pasko alang sa mga Lumad

Daw sa dili masukod ang kalipay nga gibati sa mga Katawhang Lumad (Indigenous People’s) didto sa 12 ka Sitio sa Barangay Malabog, Distrito sa Paquibato, Syudad sa Davao niining adlaw’ng Lunes, Enero 6, 2014 sa dihang nakadawat sila ug pahalipay gikan sa kinasingkasing nga pagtimbaya ug amahanong pag-amoma kanila sa atong halangdong Mayor Rodrigo Roa Duterte sa Syudad sa Davao.

Bisan tuod nga hinapos na ang maong gasa apan ang espiritu sa Pasko buhi pa nga atong gisa-ulog, kay unang Dominggo sa Bag-ong tuig sa Simbahang Katoliko mao man ang tradisyonal nga pagsaulog sa “Three Kings” o “Feast of the Epiphany” nga mao ang paghinatagay ug pag-abli sa mga gasa nga nadawat panahon sa Pasko. Sumala pa ni Fr. Russel Bantiles, DCD, kabulig nga Pari sa Parokya sa Sagrado Corazon de Jesus sa Obrero, nga didto sa España, kini usa ka espesyal nga okasyon gihatag lamang sa Simbahang Katoliko sa maong nasud nga kada Enero 6 sa matag tuig ang “Three Kings” o “Feast of the Epiphany” nga pagasaulogon sa maong petsa ug ipahigayon nila ang paghinatagay sa mga gasa ug pag-abli niini agig selebrasyon sa maong okasyon sa pagsaulog.

Kining maong malipayong okasyon nahimong malampuson pinaagi sa pagtinabangay sa Opisina sa Mayor ug mga staff niini, Opisina sa City Engineer’s, Opisina sa 911 ug labi na gayud sa Pamunoan sa FELCRIS Supermarket nga maoy naghatag sa 300 ka balde nga puno sa nagkadaiyang Grocery Items ug bugas, lakip na niini ang pagtabang sa pagpahigayon aron madayon kini pinaagi ni Fr. Emmanuel “Bong” Gonzaga, DCD ang Chaplain sa atong Katoliko ug Kristohanong pagtuo sa Syudad sa Davao nga mao usab ang Kura Paroko sa Parokya ni San Francisco de Assissi sa Barangay Ma-a, busa napahigayon ang maong boluhaton sa pag-alagad ngadto sa 300 ka mga pamilya sa Tribong ATA-Manobo sa mga Lumad sa maong dapit. Si Sandi Andales ang drayber sa Dumptruck sa CEO ug si Juanito “Toto” De los Santos sa 911 ug ang mga boluntaryong lumilihok sa Indigenous People’s Apostolate (IPA) nga naa sa Direktiba ni Fr. Florencio “Jhun” A. Acedo, Jr., DCD, ang nitabang pagdala ug pagpanghatag sa maong pahalipay. ”Dakol pasalamat ney kaniyo Mayor Rody te pinaskuhan pogbohoy kanami langon Tribo ATA-Manobo te Malabeg. Buhoyan ka te Manama te moupeyan panlawa matag aldaw wey malayat ne ukol,” pulong nga gipaabot sa mga Lumad ngadto kang Mayor Rody agig pasalamat. (jmgbo)