Kaloy-an kita sa Ginoo

Ika-25 nga Domingo sa Ordinaryong Panahon (September 20, 2020)
Is. 55:6-9 / Sal. 145 / Phil. 1:20c-24, 27a / Mt. 20:1-16

Kaloy-an kita sa Ginoo. Kini ang dugay na natong madungog ug kanunay gihapon natog gilauman nga malooy ra gayod ang Ginoo sa tanan natong paningkamot. Diha sa bisan unsang kahimtang ang Ginoo dili gayod mobiya kanato, kondili kanunay mohatag sa atong panginahanglan.

Kini ang gipasabot sa atong mga pagbasa karon. Lisod sabton ngano nga pareho lamang ang suhol nga nadawat sa mga mitrabaho nga duna may nauna ug duna puy naulahi. Kasagaran kanato mohatag og dakong sweldo niadtong mas taas og serbisyo ug mas mubo ang suhol niadtong kadiyot lamang motrabaho.

Apan ang mensahe mao nga ang grasya ug pagkamanggihatagon sa Ginoo walay pagkwenta, walay sukod. Wala siyay pinalabi. Mao gani nga nasinati gayod kini ni San Pablo sa iyang kinabuhi nga kanhi maglulotos apan nahimong pinakadakong magsasangyaw sa nabanhaw nga Kristo. Sa iyang pagkapinili nga gihasol sa yutan-on nga kahimtang, siya gipili nga mosaksi sa kusog ug gahum sa Dios.

Mao nga dili masabtan ang paagi sa Ginoo. Sukad pa ni Propeta Isaias, ang kaayo ug gugma sa Dios nga kanaunayng nagtawag sa pagbalik sa tawo, dili na matugkad. Kay ang iyang paagi puno sa kalooy, pasensya ug pagsabot. Bisan sa kagahig ulo sa tawo, siya magpadayon nga motabang. Dili siya manimalos nga kita mag-antus. Naghatag siya kanunay og lugway.

Niining panahon sa pandemya, aduna kitay kadaganan, adunay kitay kadangpan. Dili kita magpanuko sa pagduol sa Ginoo ug sa Simbahan kay bisan unsa ug bisan kinsa kita, magpabilin kita nga puno sa dungog sa kanunay. Si Santo Papa Francisco nagakanayon, “Ang Simbahan kinahanglan mamahimong luna sa kalooy nga gawasnong gihatag, diin ang matag usa gidawat, gihigugma, gipasaylo ug gidasig nga magpuyo sa maayong kinabuhi sa Ebanghelyo.” Kay sa pagkatinuod, ang Ginoo malooy kanato.