‘Unta ang pamilya mabalaan usab’

Ang Sagrada Pamilya ni Hesus, Maria ug Jose ang hinungdan nga unta mabalaan usab ang matag pamilya.
Sa pagsaulog sa kapistahan sa Sagrada Pamilya niadtong milabay’ng Disyembre 29, 2013, ang Arsobispo sa Dabaw Romulo G. Valles nag-awhag sa mga pamilya nga himoong sumbanan sa matag pamilya ang kinabuhi sa pamilya ni Hesus, Maria ug Jose.

“Ang atong standard sa balay dili kanang naa sa TV kay kita Kristohanon. Mga asawa, sunda ang inyong bana. Mga bana, higugmaa inyong asawa. Mga anak, pagmasinugtanon kamo sa inyong ginikanan,” sumala ni Abp. Valles nga nagbase sa mga balasahon niadtong adlawa.

Giingon ni Abp. Valles nga ang matag pamilya dili angay mulantaw lang sa mga kalisdanan ug mga kakulangan tungod kay walay perfecto nga pamilya.

Subay sa tema: “Nagkahiusa sa pag-amoma sa Pamilya ug Kinaiyahan” ang Holy Family Parish, Baliok nagsaulog sa ika ika-siyam nga tuig nga kapistahan diin si Abp. Valles ang nangulo sa Misa.
Dugang pa ni Abp. Valles nga kung adunay kahiusahan ug pag-amoma sa pamilya ug kinaiyahan, daghang kasakitan ug problema sa kalibutan ang masulbad.

Gipasidunggan usab ni Abp. Valles ang pagsaulog sa kapistahan tungod gipakita niini nga si Hesus gipaagi sa pamilya aron makita sa katawhan unsa ang lig-on nga pamilya nga maoy magmatoo sa bata.
“Duna kitay gasa, abilidad nga magmatoto sa mga kabataan nga mutubo sama ni Hesus. Mapagawas sa matag sakop sa pamilya ang pinakamaatyo nga anaa niya,” sumala ni Abp. Valles nga mao ang leksyon nga matun-an sa pamilya ni Hesus, Maria ug Jose.

Sa pagsaulog sa National Bible Month karong Enero, gi-awhag usab ang matag pamilya nga pasidunggan ang Bibliya pinaagi sa Family Bible Enthronement sa matag panimalay.

Gani gisugdan sa mga parokya sa Archdiocese of Davao ang pagpasidungog sa Bibliya niadtong Disyembre 29, atol sa kapistahan sa Balaang Pamilya ug ipadayon kini sa pagsaulog sa Bible Sunday, Enero 26.
Ang katekesis sa Pagpasidungog sa Bibliya nga gihimo sa Archdiocesan Bible Apostolate of Davao (ABAD) nag-ingon nga “Giawhag ang pamilya diin napahigayon ang pagpasidungog sa Bibliya sa pagtigom matag adlaw taliwala sa Bibliya, ang Pulong sa Dios, aron magtuon ug mamalandong, magpaambit ug mag-ampo, magsangyaw ug magpuyo sa Pulong sa Dios.”

“Ang Bibliya maoy instrumento sa pagtuo nga magdala sa tinuod nga pagpailob aron magkahiusa ang tibuok pamilya ug makapabag-o sa atong katilingban.” (John Frances C. Fuentes/@dcherald)