Duha ka mga Pari sa MSP Mibisita sa DXGN 89.9 Spirit FM

Duha ka mga pari gikan sa Mission Society of the Philippines (MSP) ang dili pa lamang dugay nahimong guests sa Ambit GN ug Kasikas – mga programa sa DXGN 89.9 Spirit FM. Sila si Rev. Fr. Julian Amamangpang, house animator ug Rev. Fr. Ryan Jay Aban, vocation director.

Agi’g pagpasalamat sa Ginoo sa gasa sa misyon, ang duha ka mga pari migahin sa ilang panahon aron magpasalamat sa mga Katolikong Pilipino sa ilang mapadayonon nga pagsuporta sa mga misyonerong Pilipino pinaagi sa pag-ampo ug materyal nga mga ayuda. Atol kini sa kalihukan sa Fil-Mission Sunday nga gisaulog sa tibuok Katolikong Simbahan sa Pilipinas matag katapusang Dominggo sa Hulyo.

Tungod kay higayon sab ang pagsaulog sa pagkabig sa mga kabatan-onan nga mutubag sa tawag sa kinabuhing misyonero, gisaysay sa duha ka pari ang ilang mabulukon nga mga kasinatian sa langyawng dapit diha sa ilang pagsangyaw sa Ebanghelyo.

Si Fr. Julian Amamangpang trientay sais na ka tuig sa iyang pagkapari. Nagsugod siya sa MSP niadtong dekada otsenta isip misyonero ug nagpadayon nga malipayon hangtud karon tungod sa grasya ug kaayo sa Diyos. Nahimo siyang misyonero sa Papua New Guinea, Solomon Islands (diin nag-alagad siya isip judicial vicar sa hamubo nga termino) ug Taiwan sulod sa onse ka tuig. Matud pa niya, dili na bag-o kaniya ang kinabuhing misyon.

Iyang gidugang nga anaa kanunay ang kahayag ug landong sa pagsangyaw sa mga langyawng dapit. Sa usa ka bahin anaa ang kalipay nga makita ang pagtubo sa kaugalingon diha sa pag-alagad uban ang katilingban diin ang usa ka misyonero makakat-on sa pagpuyo kung unsa ang kinabuhi sa mga tawo. Apil na usab dinhi ang kalipay nga nahimong kabahin ang misyonero sa pagtubo sa lokal nga simbahan.

Sa laing bahin usab, anaa ang mga kahadlok, kalaay ug kabalaka ilabi na nga halayo sa pamilya ug sa nasud. Gisaysay ni Fr. Juls (ang sagad nga tawag kaniya) nga dunay duha ka matang sa kalisdanan ang iyang nasinatian sa kinabuhing misyonero. Una, anaa ang pisikal nga kalisod. Matud niya duha ka higayon siya nga nataptan ug malaria ug hapit siya mamatay. Hapit sab siya patya human gitulis sa pagtoo nga duna siyay dalang salapi. Ikaduha, iyang gisaysay ang sikolohikal nga kalisdanan diin kabahin niini ang pagsinati sa tumang kamingaw ug pag-inusara, ang kalisod sa pagsulod sa kultura sa katawhan ug ang pagtuon sa sinultian sa mga tawo. Apan taliwala niining tanan, iyang gikanayon nga mas milig-on ang iyang pagtoo ug mitubo siya diha sa pagsangyaw.

Si Fr. Ryan Jay Aban, sa laing bahin, upat na ka tuig sa iyang pagkapari. Kanhi siyang magduduyog sa parokya sa Sacred Heart of Jesus sa Obrero. Gipili niya ang MSP tungod kay nakita niya ang talagsaon nga pagkamugna niini tungod sa gasa sa pagtoo. Bag-o siya naordinahan isip pari, gipadala siya sa Tukelau Islands sa South Pacific. Barko ra ang masakyan padulong niining dapita ug muabot sa 36 ka oras ang paglawig sa kadagatan gikan sa pinakaduol nga isla sa Samoa.

Iyang gipaambit nga manggihatagon kaayo ang mga tawo sa Tukelau. Anaa kanunay ang pagpaambit sa mga gasa nga nadawat. Gidugang niya nga bisan anaa ang kalisdanan tungod sa kalayo sa isla, nagpabilin kaniya ang kalipay sa pagkamisyonero ug matud pa niya di kini kabayran.

Agi’g panghinapos, gitanyag ni Fr. Juls ang mga musunod nga mga panginahanglanon sa mga buot musulod sa MSP: kinahanglan nga dako’g mata aron makakita sa panginahanglan sa simbahan, kinahanglan dako’g dalunggan aron makaantigong maminaw sa mga panghitabo sa katilingban nga angayng tubagon, kinahanglan nga dako’g baba aron makaantigong musulti sa isugo sa Ginoo sa iyang pagsangyaw, kinahanglan nga dako’g kasingkasing aron makaantigong maluoy sama sa pagkamaloloy-on sa Diyos ug kinahanglan nga hapsay’g pangutok aron gamiton ang kinaadman alang sa pag-alagad sa simbahan ug kalamboan sa katawhan. (Jerick Asdang)