Ang Espiritu Santo Diha sa Simbahan

P:Unsa man ang kalambigitan tali sa Espiritu ug ni Cristo diha sa iyang yutan-ong misyon?
T: Sugod pa sa iyang Pagkahimong Tawo, ang Anak sa Dios gikonsagrahan diha sa iyang pagkatawhanon isip ang Mesiyas pinaagi sa pagdihog sa Espiritu. Gipadayag Niya ang Espiritu diha sa iyang pagpanudlo, gituman ang mga saad nga gihimo ngadto sa Simbahan sa pagkahimugso niini sa dihang gihuypan niya ang mga apostoles human sa Pagkabanhaw.

P: Unsa may nahitabo sa Pentekostes?
T: Sa Pentekostes, kalim-an ka adlaw human sa Pagkabanhaw, ang mahimayaong Jesucristo mipabuhagay nga madagayaon sa Espiritu ug mipadayag kaniya isip usa ka diosnong Persona, sa ingon nga ang Balaang Trinidad napadayag sa hingpit. Ang misyon ni Cristo ug sa Espiritu nahimong misyon sa Simbahan nga gipadala aron sa pagsangyaw ug pagsabwag sa misteryo sa pagkahiusa sa Balaang Trinidad.
“Among nakita ang matuod nga Kahayag, among nadawat ang langitnong Espiritu, among nakaplagan ang matuod nga pagtoo, among gisimba ang dili-mabahin nga Trinidad, nga nagluwas kanamo”.

P:Unsa man ang gibuhat sa Espiritu diha sa Simbahan?
T: Ang Espiritu nagatukod, nagahatag og kinabuhi ug nagabalaan sa Simbahan. Isip ang Espiritu sa Gugma, iyang gipahiuli ngadto sa mga binunyagan ang diosnong kasamahan nga nawagtang gumikan sa sala ug gipapyuyo niya sila diha ni Cristo sa mismong kinabuhi sa Balaang Trinidad. Gipadala niya sila aron pagsaksi sa Kamatuoran ni Cristo ug gihan-ay niya sila diha sa ilang tagsa-tagsa ka mga tahas aron ang tanan makabaton “og bunga sa Espiritu” (Galacia 5:22).

(Cf. Kompendiyo sa Katekismo sa Simbahang Katoliko, 143-145)