Kumusta man ang atong kasingkasing?

Ika-Napulo’g Walo nga Dominggo sa Ordinaryong Panahon (Agosto 2, 2020)
Is. 55:1-3 / Salmo 145:8-9, 15-16, 17-18 / Rom. 8:35, 37-39 / Matt. 14:13-21

Kadtong nag-eskwela pa ko sa usa ka kolehiyong tulunghaan kinse na ka tuig ang milabay, duna koy kasinatian sa usa ka batan-ong lalaki nga di sakto og paminsar. Akong nasayran nga ang maong batan-on nakaeskwela ug law, nahuman apan wala makapasar sa bar exam. Akong mabantayan nga kanunay ni siyang maglaroy-laroy ug mangayo ug pagkaon. Unya dunay usa ka higayon pagkahuman sa akong klase pagkagabii, ako ni siyang nahibalag. Sa dihang duol na siya kanako misulti ning maong batan-on ug kalit…Hey bro how is your heart? Niadtong tungora, gilabyan ko ra ang batan-on sa pagtuo nga mangayo siya ug pagkaon. Wa sab nako panumbalinga ang iyang pangutana. Apan sa akong pagpamalandong sa atong mga basahon karon, nahinumdom ko sa maong kasinatian. Kumusta na ba ang atong mga kasingkasing karon?

Ang atong mga basahon karon naghisgot sa maayo ug mahigugmaong kasingkasing sa Diyos. Kanunay nga nanumbaling ang Ginoo sa iyang katawhan kay siya maayo ug mahigugmaon. Diha sa unang basahon, gidapit sa Ginoo ang mga giuhaw ug gigutom nga muduol kaniya. Apan ang Ginoo wa lamang magdalit ug mainom o makaon nga makawagtang sa tawhanong kahidlaw – ang Ginoo nagdalit sa iyang pulong. Ang Ginoo mipasalig nga ang maminaw sa iyang pulong ug ang mupuyo niini makabaton ug matuod nga katagbawan. Ug gani diha sa Salmo, gisaysay nga ang kamot sa Ginoo kanunay nga nagpanalangin kanato ug iyang tubagon ang atong mga panginahanglan subay sa iyang kabubut-on.

Ang kaayo ug gugma sa Ginoo maoy naghiusa kanato ug way bisan kinsa o unsa nga makapahimulag kanato niining maong gugma. Si San Pablo nagkanayon sa iyang sulat ngadto sa mga taga-Roma nga bisan ang mga pagsuway, pagpanglutos ug kagutom di makapukan ning maong gugma ug kining tanan di makakuha kanato gikan sa paghigugma sa Diyos nga gipadayag sa iyang Bugtong Anak. Tungod sa kasamtangang kahimtang karon, mitumaw ang matuod nga kahimtang sa atong kasingkasing. Dunay kasingkasing nga taliwala sa kalisod, mas mipatigbabaw ang kaway pagpakabana ug kakuwang sa pagpanumbaling sa panginahanglan sa uban. Duna sab kasingkasing nga naputos sa mga kabalaka apan duna puy kasingkasing nga maayo ug mahigugmaon. Unsa man ang kahimtang ang imong kasingkasing karon?

Diha sa Ebanghelyo, gisaysay kanato nga si Hesus ug ang iyang mga tinun-an migahin ug higayon sa pagpahulay sa usa ka awaaw nga dapit. Kinsa ba kanila ang wa manginahanglan ug pagpahulay? Apan sa ilang pag-abot niadtong dapita nauna pa kanila ang libuan ka mga tawo. Niadtong tungora, buot sa mga apostoles nga papaulion ang mga tawo ngadto sa ilang mga balangay apan giingnan sila ni Hesus nga hatagan sila ug pagkaon. Ang pagpapauli sa mga apostoles sa mga tawo di lamang tungod kay wa silay ikadalit nga pagkaon kondili tungod di nila buot nga madisturbo sa ilang pagpahulay. Subo pamalandungon nga sa dayag nga panginahanglan sa katawhan, ang kaugalingong kaharuhay gihapon ang ilang gilantaw. Ug sa makadaghang higayon, mao sab kita. Atong ‘abugon’ ang nanginahanglan kay di nato buot nga mahasol sa ilang mga panginahanglan. Si Hesus nagtudlo kanato karon sa paghupot ug kasingkasing nga maayo ug mahigugmaon. Ang gugma di magpatibulaag – di mag-abog kondili maghiusa. Ang gugma maantigong manumbaling ug magpakabana.

Kining panahon sa pandemya usa ka maanindot nga higayon sa pagsuta kung kumusta na ang atong kasingkasing. Higayon kini sa pagsusi kung nahiapil pa ba ang mga kabus ug giilang ubos sa katilingban sa mga pinitik nini. Gidala kita niining kasamtangang sitwasyon ngadto sa atong ‘awaaw’ nga mga dapit – sa atong mga lawak, mga panimalay ug uban pa aron makakat-on kita sa pag-abli sa mga ganghaan sa atong kasingkasing alang niadtong mga nanginahanglan. Kumusta na ba ang atong mga kasingkasing karon?

Ginoong Hesus, ihatag kanamo ang maayo ug mahigugmaon nga kasingkasing. Amen.