Pulong sa Kinabuhi

“Hinaut unta nga ang Ginoo magdugang sa inyong gugma sa usag-usa ug sa tanang tawo.” (1 Tes. 3:12)

Usa ni sa mga pulong nga kanunay gigamit ni San Pablo, diin siya nanghinaut ug nangamuyo sa Ginoo nga mahatagan unta ug talagsaong grasya ang iyang mga katilingban (Efe 3:18; Fil 1:9). Dinhi, nangayo siya sa Ginoo ug grasya alang sa mga taga-Tesalonica, nga motubo unta sila ug mabuhong sa paghigugmaay sa usag-usa. Dili kini morag hilom nga pagsaway nga daw dili makit-an ang paghinigugmaay sa ilang katilingban, kondili nagpahinumdom lamang, sa makausa pa, mahitungod sa usa ka balaod nga nahipatik sa kinaiyahan sa gugma mismo — ang makanunayon niining paglambo.

“Hinaut unta nga ang Ginoo magdugang sa inyong gugma sa usag-usa ug sa tanang tawo.”
Tungod kay ang gugma mao ang pinaka-sentro sa kinabuhing Kristohanon, kon dili kini molambo, adunay sangpotanan sa kinabuhi isip Kristyano: moabot ang kalaay hangtod nga mapalong na kini.
Dili paigo nga malamdagan ta bahin sa sugo sa paghigugma sa isigkaingon, bisan pag nakasinati na ta sa kadasig sa kasingkasing ug may kalagsik nga daw magtukmod kanato paghimo sa unang lakang sa pag-usab sa kaugalingon nga pinasikad sa Ebanghelyo; angay gayod nga patuboon kini ug buhion sa kanunay, inubanan sa kaabtik ug kakugi. Mahitabo kini kon andam ta uban sa kamanggihatagon sa pagkupot dayon sa nagkalainlaing higayon nga gidalit kanato sa adlaw-adlawng kinabuhi.

“Hinaut unta nga ang Ginoo magdugang sa inyong gugma sa usag-usa ug sa tanang tawo.”
Sumala ni San Pablo ang Kristohanong katilingban angay nga lagsik ug mainiton sama sa usa ka tinuod nga pamilya. Dinhi nato masabtan ang panghinaut sa Apostol nga magmatngon sila aron dili mahulog sa lit-ag nga kasagaran silang mabitik: ang pag-iyahay, ang kataphaw ug pagpakaaron-ingnon, ug ang mabaw nga kinabuhing walay baroganan.

Buot ni San Pablo nga managang daan sa usa pa ka grabeng peligro nga tinuoray nahilambigit sa mga nahisgotan sa unahan: ang pagpuyo sa ordinaryong kinabuhi nga malinawon apan sirado sa kaugalingon mismo. Buot niya nga ang maong katilingban abli sa uban. Timailhan sa Diosnong gugma ang paghigugma sa kaigsoonan nga kauban nato sa pagtoo, ug sa samang higayon, makig-atubang sa tanan, makighiusa sa ilang mga suliran ug panginahanglan. Timailhan sa Diosnong gugma ang pagdawat sa bisan unsang klase sa tawo; magtaod ug taytayan, amgohon ang positibo ug i-hiusa ang kaugalingong tinguha ug panlimbasog alang sa kaayohan sa tanan, kuyog sa mga tawo nga may maayong kabubut-on.

“Hinaut unta nga ang Ginoo magdugang sa inyong gugma sa usag-usa ug sa tanang tawo.”
Unsaon man pagpuyo ning Pulong sa Kinabuhi karong bulana? Mosulay kita pagpalambo sa gugma sa usag-usa sulod mismo sa atong mga panimalay, sa mga lugar nga atong gi-trabahoan, sa atong mga pundok o kapunongan sa simbahan, sa parokya ug uban pa.

Kining Pulong sa Kinabuhi nagsukna kanato nga paawason sa kabuhong ang gugma. Usa ka Diosnong gugma nga maantigong mosaylo sa mga ordinaryong sukdanan ug sa mga nagkalainlaing babag sugod sa dili mailhan nga kahakog. Sakto ra ang paghunahuna bahin sa mga hiyas sa Diosnong gugma (ang pagkamapailubon, pagkamasinabtanon, pagtagad sa usag usa, pasyensya, andam sa pag-alagad; ang paghatag ug kalooy sa tinuod o gituhoang kasaypanan sa uban, ang pagpakig-ambit sa kabtangan, ug uban pa) aron masayran nato ang dili maihap nga higayon sa pagpuyo niini.

Tataw gayod nga kon ang maong klima sa pagbinaslanay sa gugma anaa sa atong katilingban dili mapakyas nga ang iyang kainit makatakod sa tanan. Mabatyagan kini bisan niadtong mga tawo nga wala pa makaila sa kinabuhing Kristohanon; sayon ra silang madani niini ug sa way pagduhaduha mahiapil sa atong pundok, hangtod nga mabati nilang nahisakop sila sa usa ra ka pamilya.
Nga unta panahon sa Pasko akong mahigugma
ang kada tawo nga akong mahimamat!

Maayong Pasko ug Bulahang Bag-ong Tuig Kaninyo!!!