Kapistahan sa Monasteryo sa Our Lady of Mt. Carmel sa Mati, gisaulog

Gisaulog niadtong Hulyo 16, 2020 ang Kapistahan sa monasteryo sa Our Lady of Mt. Carmel uban ang mga mongha nga kamadrehan nga nagpuyo sa maong monasteryo ug mga deboto niini pinaagi sa Santos nga Misa.

Si Most Reverend Abel C. Apigo, obispo sa Mati, ang nangulo sa Santos nga Misa nga gisaulog alas singko sa hapon inubanan sa pipila ka mga kaparian gikan sa Society of Divine Vocations, Order of Saint Augustine, diyosesano nga mga kaparian, mga kamadrehan ug mga katawhan nga nakigduyog usab sa maong kapistahan. Matud pa sa obispo nga lahi ra karong tuiga kay tungod daghan na ang nabag-o ilabi na ang mga selebrasyon sulod sa Simbahan tungod sa pagkuyanap sa Covid-19. Dili na niya makita ang malipayon nga dagway sa mga tao tungod ang tanan nakasuot man sa ilang tagsa-tagsa ka face mask isip pagsunod sa health protocols nga gipahamtang sa panggamhanan. Apan matod pa usab niya, malipayon siya tungod kay nagapadayon gihapon ang katawhan nga naningkamot sa pagsimba isip pagpakita sa ilang pagtoo.

Nakasentro ang homiliya sa obispo diha sa mga kasinatian karong mga panahona nga bisag daghan ang mga dili maayong nahitabo sa kalibutan apan nagpabilin gihapon ang pagtoo diha sa Ginoo uban sa tabang ni Birhen Maria nga nagauban ug nagagiya sa matag magtutuo diha sa espirituhanon nga kinabuhi padulong kang Hesus. Kini matod pa sa obispo tungod kay dili gayud kita biyaan niya isip usa ka inahan. Gani, tungod niining Covid-19 mas milawom pa ang pagtoo sa katawhan sa Ginoo ug nakagahin ang matag pamilya og panahon alang sa pag-ampo.

Nagmalampuson ang maong kasaulogan bisan pa sa mga higpit nga pagpahamtang sa mga safety ug health protocols sa sulod sa simbahan. Kini isip pagtamod sa mga balaod aron malikayan ang pagkuyanap sa sakit nga COVID-19. (Jessa Jean Cañon | SocCom-Mati)