Pangitaa Una sa Tanan ang Gingharian sa Diyos

Ika-Napulo’g Pito nga Dominggo sa Ordinaryong Panahon (Hulyo 26, 2020)
1 Hari 3:5, 7-12 / Salmo 119:57, 72, 76-77, 127-130 / Rom. 8: 28-30 / Matt. 13:44-52

“Pangitaa ang gingharian ug ang katarong sa Dios ug ki’ng tanan ikadugang kaninyo…” Kini usa lamang ka tudling sa usa sa mga maanindot nga liturhiyanhong awit sa atong simbahan. Tataw kaayo diha sa maong awit nga ang pagpangita sa gingharian sa Ginoo mao ang nahauna sa mga mahinungdanong tahas sa tawo. Matud pa ni San Agustin sa Hippo, “To fall in love with God is the greatest romance; to seek him, the greatest adventure; to find him, the greatest human achievement.”

Si Solomon, bisan sa iyang linghod nga panghunahuna ug sa iyang kaway kasinatian sa pagdumala isip hari, nangayo sa Ginoo ug kaalam inay nga bahandi ug taas nga kinabuhi. Tataw kaayo kang Solomon ang tahas nga gisangon ngadto kaniya nga mao ang paggiya sa katawhan sa Ginoo. Nahimuot pag-ayo ang Ginoo kaniya kay iyang gihatagan ug gimbug-aton ang mas labing bililhon ug Diosnon nga bahandi – ang kaalam. Tungod niini, gipanalanginan siya sa Ginoo og kasingkasing nga masinabtanon – usa ka kasingkasing nga makaantigong mamati. Apan ang Ginoo mipanalangin usab sa tanan nga nagtahan sa ilang kinabuhi sa pagpangita sa Iyang gingharian. Sa iyang sulat ngadto sa mga taga-Roma, si San Pablo misaysay nga ang kinabuhi sa matag Kristohanon anaa nakaugat sa tawag sa Diyos – ang tawag nga mahisama sa iyang gingharian. Kitang tanan gitawag nga mamahimong kabahin niini apan ato lang kining makaplagan ug madawat kung atong pangayoon sa Ginoo ang grasya sa kaalam nga maoy magtukmod kanato sa pag-ila ug paghigugma kaniya ug sa iyang mga kasugoan.

Gihulagway usab ni Hesus diha sa ebanghelyo ang gingharian sa Diyos isip usa ka bahandi nga gilubong sa yuta ug sa usa ka perlas nga dunay talagsaong kaanindot. Kini mga bililhong bahandi diin ang makakaplag niini andam nga mubaligya sa tanan niyang katigayonan aron maangkon kini. Ang mensahe mao nga ang atong pagpakighigala sa Ginoo usa ka labing bililhong bahandi ug andam kita nga biyaan ang tanan magpabilin lamang niinang maong panaghinigalaay. Ang Ginoo nagtan-aw usab kanato nga mga bililhong bahandi. Unang nakighigala ang Diyos kanato ug gani bisan diha sa atong kahuyang padayon siya nga nakig-uban kanato, mipasaylo kanato, mialim sa atong mga samad ug midasig kanato sa pagtubo uban kaniya. Mao kini ang matuod nga panaghigalaay – mao kini ang labing dakong bahanding atong mahuptan kung padayon kita sa pagpangita sa iyang gingharian ug kung tugutan ta siya sa pagpangita usab kanato. Ang gingharian sa Diyos maoy mamahimong bililhong gasa nga atong mapaambit ngadto sa tanan.

Ang kasamtangang pandemya karon nagtudlo kanato nga ang gingharian sa Diyos masinati diay diha sa atong tagsa-tagsa ka pamilya, diha sa atong mga ginagmay nga paningkamot sa kahiusahan ug kalinaw, diha sa atong mga buhat sa paghigugma ug diha sa atong mga yanong kasinatian sa matag adlaw. Pangitaon ta kanunay ang gingharian sa Ginoo ug ki’ng tanan ikadugang kanato.

Ginoong Hesus, ikaw ang gingharian sa Diyos, ihatag kanamo ang grasya sa kaalam aron magkanunayon kami sa pagpangita kanimo diha sa among kinabuhi. Amen.