Ika-136 nga Kapistahan sa Parokya ug Re-dedikasyon sa Simbahan San Salvador Del Mundo, Caraga, Davao Oriental

Human sa duha ka tuig, pormal na nga giablihan sa publiko ang San Salvador del Mundo Parish nga nahimutang sa lungsod sa Caraga, Davao Oriental pinaagi sa usa ka misa atol sa selebrasyon sa ika-136 ka kapistahan sa Simbahan niadtong miaging Huwebes, Hulyo 16, 2020.

Gipanguluhan ni Most Reverend Abel C. Apigo, Obispo sa Diocese sa Mati ang Santos nga Misa dungan na niini ang pagre-dedikar sa maong simbahan nga gitambungan sa mga representante sa mga katawhan sa Caraga ug pipila ka lokal nga opisyales samtang istriktong gipatuman ang pag-obserbar sa minimum health standards niining panahon sa COVID-19.

Nagpahayag ug dakong pasalamat ang Obispo sa katumanan sa dugay na nga gipangandoy sa mga parokyano. Dungan niini, gipasabot usab niya nga bililhon gayud ang gihimong pagre-dedikar sa maong simbahan aron mahingpit ang pagka-balaan niini isip balay alampo-anan. “Ang physical structure o ang building makapa-ambit usab sa pagdasig ug paglig-on pa sa pagtoo sa mga parokyano, ug kanako isip magbalantay sa akong panon”, sigon pa sa Obispo.

Sa kabahin ni Fr. Uldarico Toroba, Jr, ang kanhi kura paroko sa parokya, ang maong kalihokan tima-an sa buhing pagtoo ngadto sa Dios. Kini taliwala sa mga nasinati nila nga kalisdanan sa pagduso sa restorasyon sa simbahan, apan naila ang mga kalisdanan sa dihang migawas na ang resulta sa ilahang pagpaningkamot.

Gipadayag ni Davao Oriental Governor Nelson Dayanghirang ang iyang dakong kalipay sa pag-abli usab sa maong makasaysayan nga simbahan nga usa ka simbolo sa panaghi-usa ug pagtinabangay sa gobyernno ug sa simbahan. Giduso pa ni Governor Dayanghirang nga sa ginagmay ug personal nga pamaagi, andam siya kanunay sa pagsuporta sa mga pagpaningkamot sa simbahan.

Ang San Salvador del Mundo nga simbahan ang ginaila nga usa sa pinakakaraan nga simbahan sa tibuok Mindanao nga nagpabilin hangtod karon nga walay gibuhat nga kausaban sa istruktura niini. Nadeklara kini nga usa ka National Historical site niadtong tuig 2018 ug gigahinan sa National Historical Commission of the Philippines (NHCP) nga mikabat sa P20 million alang sa “restoration” niini.

Misaksi usab sa okasyon ang pipila sa mga kaparian sa Diocese sa Mati, ilabina gayud ang mga pari nga naassign sa mga parokya nga miyembro sa baykaryato (vicariate) sa San Salvador del Mundo. (Facebook post courtesy of The Roman Catholic Diocese of Mati)