Pormasyon isip pundasyon sa kaugmaon alang sa mga car watchers

“Mitrabaho sila dinhi dili lang tungod kay gusto nila magkakwarta apan kinahanglan sad namong ipaduol ang ilahang kinabuhi sa Simbahan ug sa atong Ginoo,” kini matod ni Eric Hernandez, Social Action Formation Coordinator, usa sa tig-alagad og gabantay sa mga Car Watchers sa San Pablo Parish.

Dili na bag-o sa panglantaw sa mga taong gasimba sa San Pablo ang mga batan-on o mas giila sa tawag nga mga “Car Watchers” nga mudagan padulong sa ilang mga sakyanan aron bantayan kini samtang gamisa sa maong simbahan. Pinaagi niining ilang trabaho, makaangkon sila og igong kantidad nga bayad nga igo rapud nila ipangpalit og mga panginahanglanon sa tagsa- tagsa nilang mga pamilya.

Kapin tulo na katuig kining mga batan–ona nga gabantay og sakyanan sa mga manimbahay sa San Pablo Parish, nga nagpangidaron og walo(8) hangtod sa 18 anyos. Lumolupyo ang uban kanila sa Ecoland, samtang uban kanila sa Maa gapuyo. Mga bata pa kung buot huna-hunaon, pero ang kabug-aton sa ilang responsibilidad nga buhion ang ilang mga pamilya ang mibutang kanila sa maong panginabuhian, ilabi na ang uban kanila ginasuportahan ang ilang mga kaugalingon aron makapadayon sa pagtuon.

Ang mga katekista sa Social Action Formation sa San Pablo Parish, sa pagpanguna ni Bishop George Rimando, Kura Paroko sa San Pablo, ang nagpaluyo niining pagpatapok ug pag-atiman sa mga Car Watchers matag Domingo sayo sa buntag. Patambungon una nila ang mga bata sa misa una sila magsugod og bantay sa mga sakyanan nga muabot. Matag-usa kanila naa nay mga giilang teritoryo diin sila ang gabantay sa mga sakyanan nga moparada sa maong dapit.
Mapasalamaton usab ang parokya sa mga madawat nila nga tabang ug suporta nga ginahatag sa mga parokyano sa San Pablo alang niining mga Car Watchers. Tungod niini, igong sweldo og libre nga pagkaon ilabi na sa pamahaw matag buntag sa Domingo ang mahatag nila sa mga bata. Human sa ilang pagkaon ang pag-uban-uban usab nila alang sa pagtuon sa mga pulong sa Simbahan nga apil sa pormasyon isip mga anak sa Ginoo.
Matud pa ni Eric, giila sa mga bata kaniadto ang simbahan isip usa ka lugar diin sila makapangitag pampalit og panginahanglanon. Apan karon, sugod nga gitapok sila sa mga katekista sa San Pablo, nagkahinay og kabag-o ang ilang panglantaw sa kinabuhi ug mas nidako ang ilang pagtuo sa atong Manluluwas.

Mas nasabtan usab sa Simbahan ang kinabuhi sa mga bata niadtong nahatagan og higayon ang mga katekista nga mubisita sa tagsa-tagsa ka panimalay sa mga bata. Nasayran ang pipila sa mga rason kung nganong nahimong mga Car Watchers kining mga bataa. Usa na diri ang mga batang duna nay mga anak nga gibuhi. Ang uban kanila gisaligan sa ilang pamilya isip mga “bread winner”. Ug ang uban usab kanila nasayran nga nakulong na kaniadto tungod sa mga maling binuhatan aron lang mabuhi ang ilang minahal sa kinabuhi.

Apan karon dako ang kalipay sa mga nagpaluyo niining pagtapok ug pagporma sa mga Car Watchers sa kabag-ohan sa ilang kinabuhi. Nagpamatuod niini ang boluntaryong pagtabang sa mga bata kung naay mga espesyal okasyon o kasaulogan ang parokya. Makita usab sila sayo sa kabuntagon nga gatabang ug gatrabaho alang sa mga gatambong sa Misa De Gallo.

Plano sa mga katekista sa Social Action Formation sa San Pablo Parish nga mas ipalig-on pa ang pormasyon sa mga bata aron sila maandam sa tinuod nga kinabuhi nga gahulat kanila sa umaabot pa nga mga tuig.