Misa Uban ang Katawhan Gitugutan Na

Human sa kapin tulo ka bulan nga pagpaabot, nahibalik na ang pagsaulog sa Santos nga Misa uban ang katawhan dinhi sa Arkidiyosesis sa Dabaw. Kini human ipahibalo ni Pangulong Rodrigo Duterte nga napailawom na sa Modified General Community Quarantine o MGCQ ang dakbayan sa Dabaw.

Gitugutan diha sa MCGQ ang pagpahigayon sa Santos nga Misa uban ang katawhan apan sa limitadong pagtambong. Singkwenta porsyento o 50% lamang sa seating capacity sa simbahan ang gitugot. Subay usab sa mga giya sa MGCQ, dili gihapon makatambong sa Santos nga Misa ang mga 21 anyos paubos, mga 60 anyos pataas, mga masakiton ug mga nagsabak. Gilatid usab ang higpit nga pagtuman sa mga health protocols alang sa tanang manimbahay.

Bisan pa sa maong mga limitasyon malipayon ang mga magtutuo dinhi sa lokal nga simbahan sa Dabaw tungod kay hinay-hinay nang nahibalik ang misa uban ang katawhan. Matod pa sa usa ka parokyano sa San Pablo nga daw mitulo iyang luha sa kahinangop ug kalipay human siya subling nakasimba.

Tungod kay wa pa gitugot sa lokal nga panggamhanan ang paggawas sa adlawng Dominggo, ang atong Arsobispo Romulo G. Valles mitugot nga saulogon ang misa sa Dominggo ‘in advance’ kon anticipated Mass sa gabii sa mga adlawng Miyerkules hangtud Sabado. Buot pasabot niini nga kung ang usa ka magtotoo mosimba sa usa niining anticipated masses, nakasimba na siya sa adlawng Dominggo ‘in advance’.

Gawas niining mga anticipated Masses, padayon gihapon ang pagsaulog sa Santos nga Misa uban ang katawhan sa tibuok semana o daily Mass sa mga gikatakdang schedule niini sa matag parokya.

Dugang pa niana, nagpadayon usab ang live-streaming Masses sa DXGN 89.9 Spirit FM alang sa mga masakiton ug alang niadtong gidid-an sa paggawas sa ilang panimalay sumala sa mando sa gobyerno.

Nanghinaut ang tanan nga mawagtang na ang pandemya sa COVID-19 aron mahibalik na sa hingpit ang pagsaulog sa Santos nga Misa uban ang tanang katawhan. (Jerick Asdang)