Ika-172 ka Tuig nga Kapistahan Gisaulog sa Parokya sa San Pedro Cathedral

Luyo sa hulga sa COVID-19 nga pandemya, ang Parokya sa San Pedro Cathedral malipayon ug maisugon nga nagsaulog sa ilang ika-172 ka tuig nga kapistahan. Ang Auxiliary Bishop sa Arkidiyosesis sa Dabaw Most. Rev. George Rimando, D.D. ang nangulo sa Santos nga Eyukaristiya kauban ang pipila ka mga kaparian. Pinasahi kining maong pagsaulog tungod kay anaa pa man sa General Community Quarantine ang dakbayan tungod sa COVID-19 ug wala gitugutan ang panagtapok diha sulod sa simbahan nga mulapas sa napulo ka tawo.

Isip kanhing kura paroko sa parokya sa San Pedro Cathedral si Bishop George mipaambit sa iyang mga kasinatian sa mga milabay nga kapistahan diin iyang nahinumduman ang kasadya sa mga katawhan nga miduyog sa kasaulogan. Matud niya nga adunay gibating kaguol karon tungod sa sitwasyon apan dili kini mamahimong babag aron makaambit ang katawhan sa kalipay ug gugma sa Dios. Iyang gidasig usab ang katawhan nga mahisama kang Señor San Pedro nga maisugon sa pagsunod ug pagtubag sa tawag sa Diyos luyo sa kahuyang, pagduha-duha ug kahadlok. Dugang pa niya nga magmalahutayon unta kita sa atong pagtoo bisan pa man sa mga pagsuway nga atong nasinatian ug magmalaumon sa kanunay inubanan sa pag-ampo nga kita makaangkon ug kahupayan ug pag-alim sa Dios.

Isip panghinapos sa iyang pagpaambit, si Obispo Rimando nagkanayon nga ang kalisud nga atong nahiaguman tungod sa pandemya makonsidera nato nga kangitngit sa atong kinabuhi apan kini usa usab ka paagi nga atong makita ang kahayag sa Dios diha sa atong pagpabilin sa Iyang gugma. Ang hagit matud niya nga bisan unsang matang sa pagsuway mapadayonon kita sa pagtubag sa tawag nga mamahimong balaan ug magmatinud-anon sa pagbuhat sa misyon isip mangingisda sa katawhan.

Sa atong pag-ampo sa atong Ginoo atong pangayoon ang makanunayong pagpangama ni Señor San Pedro nga sa kanunay iya kitang panalipdan. VIVA Señor San Pedro! (Dan Albert Russell Diamola)