Padayon kitang magsangyaw sa kaayo sa Ginoo

Ikanapulog-tulo nga Domingo sa Ordinaryong Panahon (June 28, 2020)
2 Kings 4:8-11, 14-16A / Ps 89:2-3, 16-17, 18-19 / Rom 6:3-4, 8-11 / Matt 10:37-42

Kasagaran nahimo na gayod nato karon ang pagsuot sa face mask, labina kung moatubang tag mga tawo, sa pagpanghunaw o sanitize kanunay, sa social distance. Kini daw kabahin na o automatic nga dili na kita kinahanglang sultihan pa matag karon ug unya. Nahimo na kining prioridad o unang himuon isip kabahin sa matag adlaw.

Sa Ebanghelyo gihagit usab kita ni Kristo nga kung buot kita mamahimong iyang mga tinun-an, prioridad nato siya mismo. Kung mosunod kita kaniya, siya ang una o automatic natong hatagan ug bili ug pagtagad. Ang tawong moalagad kaniya andam mobiya sa bisan unsang butang o relasyon nga makapababag kaniya nga mahimong suod kang Kristo. Walay mas importante bisan pa mga ginikanan, igsuon o pamilya ang makalabaw sa pagbuhata unsay makapahimuot sa Ginoo.

Ang atong bunyag maoy makapagahum kanato nga si Kristo mahimong kabahin gayod kanato. Murag automatic na nga andam kitang mamatay sa atong kaugalingong gusto ug kasigurohan aron itahan nato ang tanan ngadto kang Kristo. Dili na kita ang angay nga sundon kay masaligon kita nga si Kristo maoy mohatag kanatog kusog ug kahulogan nga makontento sa kinabuhi. Ang kahuyang sa kalibotanon nga dikta gibuntog na sa pagka-Dios ni Kristo nga mipuyo sa atong kasing-kasing pinaagi sa atong bunyag.

Kung gibati man nato usahay nga kita gihikawan, sama sa pagkulang sa usa ka anak sa babaye diha sa unang pagbasa. Ang Dios magpadala og instrumento aron maangkon ang iyang gipangandoy. Kita usab hatagan sa atong gipangandoy sa bisan unsang pagkulang ug kasiguroan. Ang Dios mohatag sa unsay makapatagbaw sa atong panginahanglan labina sa unsay makahatag kanatog kaayohan.

Sa kalisod ug hagit nga atong giatubang karon, kabahin na nato ang paghimog unsay makaayo sa uban kay maayo gayod ang Dios kanato. Kabahin ug automatic na nato ang pag-alagad nga masaligon ug malipayon kay sayod kita nga si Kristo maoy atong kasigurona. Awiton nato kanunay ang kaayo sa Ginoo.