Kita ang katawhan sa pagsalig ug paglaum

Sixth Sunday of Easter (May 17, 2020)
Acts 8:5-8, 14-17 / Ps 66:1-3, 4-5, 6-7, 16, 20 / 1 Pet 3:15-18 / Jn 14:15-21

Tungod sa kwarentinas nato karon, adunay pipila nabugnaw, napul-an. Duna puy pipila nga nawad-an sa paglaum, daw ningitngit ang kaugmaon. Apan alang sa mga tawong nagtuo kang Kristo nga nabanhaw, alang sa mga tinuod nga Kristiyanos, ang kahayag sa Manluluwasa kanunay nagdan-ag.

Sa unang pagbasa, ang mga tinun-an ni Kristo, sama nila Felipe ug Pedro, nakahaling sa dakong pagsalig ug paglaum sa Dios nga moayo sa mga masakiton. Nakapabuhi sa dugo, nakapadasig sila sa kinabuhi tungod kay ang ilang pagtudlo ug mga maayong buhat nakita diha sa daghang mga nangaayo tungod sa ilang pag-ampo ug pagsalig sa sa buhi nga Dios.

Sa ikaduhang pagbasa, kita gipahimangnoan nga kining pagsalig ug paglaum, atong ipakita nga puno sa kalumo ug pagtahod, ilabina sa mga nangandoy sa pagpasabot sa paglaum. Kita giawhag sa paghatag paglaum niadtong mga naluya, niadtong gipanghimaraot, niadtong mga naulawan. Mas maayo pa kanato nga mag-antus alang sa uban aron ang maayo natong buhat maghatag paglaum kanila nga nangaluya.

Sa Ebanghelyo, kita gipasaligan sa dakong paglaum nga ang Espiritu Santo ipadala ni Kristo kanatong iyang mga pinanggang magtotoo. Pinaagi niining Espiritu sa kamatuoran, dili kita biyaan ug dili isalikway sa Ginoo. Bisan pa man sa makadiyot siya mawala sa atong taliwala, siya kanunay makighiusa kanato sama nga siya ug ang Amahan usa ra. Kining maong pagsalig ug paglaum unta atong mapakita diha sa pagsunod sa iyang mga sugo isip pagpadayag sa atong gugma kaniya.

Taliwala niining krisis karon, daghang mga maayong butang nga atong nasinati, sama na lang sa pagkasuod sa pamilya, higayon sa pag-ampo, pagpahulay sa pagtrabaho, kasinatina sa paghinatagay, kalimpyo sa palibot, pagmenos sa polusyon, ug uban pa. Ang pagkugi ug sakripisyo sa atong mga opisyales sa gobyerno, ang kaalam ug giya sa atong mga pangulo sa simbahan, ang walay pagkwenta sa atong mga frontliners nga adlaw ug gabii kanunay nagbudlay, kining tanan timailhan sa pagsalig ug paglaum. Busa, sama sa giingon sa Salmo, maglipay unta ang tibuok kalibotan nga puno sa pagsalig ug paglaum.