Kinsa si Santa Klaus ug unsa ang Misa De Gallo?

Adunay daghang pangutana karon bahin sa usa sa dakong hulagway sa kasaulogan sa pasko mao ang pagtoo ug pag-ila kang Santa Klaus. Gani tungod niini nakadungag sa ka bibo ug ka malipayon sa pagsaulog sa pasko tungod sa usa ka hiyas ni Santa Klaus nga atong ginaila karon mao ang PAGKA-MANGGIHATAGON niya sa tanan. Nahimo siya nga usa ka simbolo sa paghinatagay ug gasa sa Pasko.

Si Santa Klaus karong usa sa pinaka-ilado nga hulagway sa pagsaulog nato sa Pasko, ug naila siya sa orihinal nga panagway nga nakasuot ug bisti sa usa ka Obispo ug sa karon siya gihulagway nga usa ka tambok, sadya ug adunay puti nga bungot ug nagsuot ug pula nga jacket nga adunay puti nga kwelyo ug aduna siyay itom nga bakos ug sapatos. Kini nga imahe nahimong labing sikat sa tibook kalibutan ilabi na sa pagsulod sa ika-19 ka siglo hangtud karon.

Sa pagkatinuod si Santa Klaus nga atong giila karon mao si San Nicolas sa Myra o St. Nicholas of Myra (Greek: Άγιος Νικόλαος , Agios [“saint”] Nikolaos [“victory of the people”]) (270 – 6 December 346). Usa siya ka Obispo niadtong ika-upat ka siglo o 4th century sa Myra (karon Demre), sa Lycia usa ka Probinsya sa Byzantine Anatolia nga karon mao ang TURKEY. Si San Nicolas naila kaniadto sa iyang PAGKA-MANGGIHATAGON UG GASA SA MGA POBRE ilabi sa iyang pagka-manggihatagon sa tulo ka anak nga babae sa usa ka Kristohanon aron nga ang iyang mga anak dili mahimong usa ka binayran nga babae o usa ka puta (prostitute).
Siya usa ka relihiyoso sukad pa sa iyang pagka-bata ug sa tibook niyang kinabuhi siya nagmatinud-anon sa iyang pagka-Kristohanon. Tungod sa iyang mga milagro nga mga nahimo pinaagi sa pag-sangpit ug pagpataliwala niya naila usab siya nga usa ka katingalahang matatrabaho o wonder worker. Aduna siyay dako nga dungog isip sekreto nga nagahatag ug gasa sama sa pagbutang ug mga sinsilyo o kwarta sa mga sapatos niadtong mga tawo nga nanginahanglan ug tabang mao nga usa sa hinungdan nga nailado siya ug gitawag sa ngalan nga Santa Klaus. Siya namatay niadtong Desyembre 6, AD 343 didto sa Myra (Turkey), siya ang Patron sa mga maglalayag o sailors ug mananagat.

MISA DE GALLO?

Ang Misa de Gallo gikan sa espanyol nga pulong alang sa tungang gabii nga misa (Midnight Mass), ug literal kini nga gihubad nga Rooster’s Mass. Kini naggikan sa usa ka idiya nga pina-agi sa pagtuk-tugaok sa usa ka Sunoy o Manok nga diin sila ang unang nakasaksi sa pagkatawo ni Ginoong Jesukristo. Ug sa atong kustumbre dinhi sa Pilipinas usa kini ka Nobena sa kadlawon nga Misa. Kasagaran kining nagasugod sa 3:00-4:30 am, ug magsugod kini sa Desyembre 16 hangtud sa Desyembre 24.

Kini nga pamatasan nasunod nato panahon sa pagsakop sa mga Espanyol kanato, diin ang mga Pari nagahimo ug kadlawon nga Misa alang sa mag-uuma kaniadto nga gustong motambong sa Misa sa Pasko sanglit dili man sila makabiya sa ilang mga umahan (cf. http://en.wikipedia.org/wiki/Misa_del_Gallo).
Kini nga mga santos nga Misa ginasaulog sa dili pa mogawas ang adlaw, ug gani sa atong Filipino nga termino gitawag kini ug Simbang Gabi, bisan karon kitang mga Filipino natamod gayud nato nga momata kita sa sayong kabuntagon o kadlawon aron sa pag-apil sa Misa de Gallo aron sa pagpadayag sa atong debosyon ngadto sa Dios ug sa Mahal nga Berhing Maria.

Usa kini ka maayo nga hiyas isip Kristiyanos timaan sa atong pagka-Diosnon, sanglit nagkahiusa kita sa pagsimba agi ug pagpangandam nato sa kasaulogan sa paghandom sa natawhan sa atong Ginoo. Usa kini siya ka debosyon ug pag- nobena nato pinaagi sa pagtambong sa Misa sulod sa siyam ka adlaw. Usa kini ka komon nga pagtoo nga kun ang matag-usa mokumpleto sa pagsimba sulod sa siyam ka-adlaw sa kinasing-kasing gayud kini makahatag ug katumanan sa atong mga gipangayo ug pangandoy, kay kini usa usab ka sakripisyo sa atong pagsimba ug pagpasalamat sa Dios sa dakong gasa nga gihatag dinhi kanato mao ang iyang pagpakatawo.
Mga Kaigsonan namo kami uban sa among grupo ug tibook pamilya kami sa kanunay nagapanghinaut nga saulogon nato kining pagkatawo sa atong Ginoo sa pagtamod sa atong gugma sa matag-usa ug sa kanunay mag-ampo kita sa kalinaw alang sa tanan. MERRY CHRISTMAS AND HAPPY NEW YEAR TO ALL!