Ang Kaanindot sa Sakramento sa Kumpisal!

Ika-lima nga Domingo sa Kuwaresma
Ezek 37:12-14 / Ps 130:1-2, 3-4, 5-6, 7-8 / Rom 8:8-11 / Jn 11:1-45

Sa atong espirituhanong pagpanaw, ilabi na sa panahon sa Kuwaresma wala kita mag-inusara, ug dili kita angay nga mag-inusara. Isip pumapanaw, mag-kauban kita isip sakop sa katilingban, usa ka pamilya sa Dios. Kinahanglan nato ang usa’g usa; gimugna kita nga dili mahimong independente apan masaligon sa usa’g usa. Mapamatud-an kini sa diha nga kita mahulog sa sala. Ang salang mortal nagputol sa atong relasyon tali sa Dios ug tali sa atong katilingban. Wala na kitay gahum nga makatindog pa kon wala ang uban. Nagkinahanglan kita sa uban, sa Simbahan, aron magkauli kita ngadto kang Jesus ug mahibalik ang atong kagawasan ug kinabuhi. Sa samang pagkasulti, kinahangalan usab natong tabangan ang uban aron mabag-o ang ilang kinabuhi. Matud pa bitaw ni Santiago: “angay ninyong masayran nga kadtong makadani sa usa ka makasasala gikan sa iyang pagkadaotan magluwas kaniya gikan sa kamatayon ug daghang mga sala ang mapasaylo tungod kaniya.”

Mao kini ang gipadayag sa atong ebanghelyo karong Domingoha. Si Lazaro higala ni Jesus. Namatay siya ug upat na ka-adlaw nga gilubong. Miabot si Jesus, ug mibanhaw kaniya gikan sa kamatayon pinaagi sa pagtawag kaniya: “Lazaro, gula ngari” (v.43). Unsay mahinungdanon ning panghitabo, mao nga sa dili madugay, mohatag siya ug sugo ngadto sa mga disipolo; “Badbari ninyo siya ug palakta.” (v.44). Bisan kon si Lazaro gibanhaw, dili siya makalihok tungod sa mga panapton sa paglubong nga naghigot sa iyang mga kamot ug tiil. Lain ang mobadbad niini aron siya makalingkawas sa pagkagapos. Nag-awhag si Jesus sa kooperasyon sa iyang mga disipolos aron mahatagan si Lazaro sa hingpit nga kalingkawasan ug bag-ong kinabuhi.

Ang Ebanghelyo nagpadayag sa Sakramento sa Pagkumpisal. Kita nga anaa sa sala nga mortal, sama ra nga patay kita diha sa espiritu. Bisan kon buot sa Dios nga pasayloon kita ug hatagan sa bag-ong kinabuhi, nagpaabot siya sa atong kaugalingong gawasnong pagtugot. Bisan kon daku kaayo ang atong tinguha sa pagpakig-uli ngadto sa Dios, dili kita makahimo niini nga mag-inusara kay gigapos kita sa atong sala. Mao kana ang papel sa Simbahan, ang katilingban nga adunay pagtuo. Pinaagi sa ministriya sa Simbahan diha sa Sakramento sa Kumpisal, ang pari mao ang mobadbad sa nakagapos nga sala pinaagi sa mga pulong sa Sakramento sa pagpasaylo.

Salamat sa Dios, isip mga Kristyanos aduna gihapon kitay paglaum. Tungod sa iyang dili matukib nga kaalam ug labing dakung gugma sa mga makasasala, gihatagan kita sa Sakramento sa Kumpisal. Wala gayud kita mag-inusara sa pagpangita sa iyang kalooy ug pasaylo. Ang Simbahan pinaagi sa mga pari, nga nagabuhat uban kang Jesus, niining Sakramento, nagpadayon pagbugto sa migapos natong sala ug naghatag kanato sa kalingkawasan. Ania na kita sa ikalima nga Domingo sa Kuwaresma, unsa pay atong gipaabot? Basin wala na kitay panahon. Seryoso kita mahitungod sa atong bayranan sa buhis ug nahibalo kita kanus-a ang ‘dealine’. Apan ang mahitungod sa atong kalag, walay nakahibalo sa ‘deadline’ – basin moabot ang panahon nga wala nato paabuta.