Halad kang Mama Maria

Gikalipay pag-ayo sa World Apostolate of Fatima (WAF) Digos Diocesan Division ang 24 ka mga partisipante nga niapil sa WAF Seminar didto sa Our Mother of Perpetual Help Parish, Guihing, Davao del Sur. Ang mga partisipante mga miyembro sa Parish Pastoral Council (PPC) nga nakig-uban sa atong Mahal nga Inahan si Maria diha sa ilang pagpaminaw ug pagpamalandong sa mensahe sa Fatima. Kining maong seminar gipahigayon niadtong Pebrero 22-23, 2020, adlawng Sabado ug Dominggo sulod sa ilang parish seminar house.

Ang mga nahisgutang mga mensahe sa Fatima naghatag kanila ug dugang kahibalo nga magpuyo diha sa grasya sa Diyos pinaagi sa makanunayong pag-ampo agig pagbalaan sa adlaw-adlaw nga gimbuhaton. Isip pagsunod sa mensahe ni Mama Maria sa Fatima, gihalad nila ang ilang kaugalingon agig pakighiusa kaniya diha sa pagsul-ob sa brown scapular. Mismong si Rev. Fr. Rico H. Dingal, DCD, kura paroko sa maong simbahan ang nag-bless ug nag-invest sa brown scapular ngadto kanila sulod sa alas-singko nga misa sa hapon. (Glen Miculob | SUGID Correspondent WAF/YAF)