“Paminaw Kaniya!”

Ika-Duhang Dominggo sa Kuwaresma
Gn 12:1-4a / Ps 33:4-5, 18-19, 20, 22 / 2 Tim 1:8b-10 / Mt 17:1-9

Sa Ebanghelyo ni San Matthew kaduha nato madungog ang tingog sa Amahan. Ang una mao kadtong pagbunyag kaniya didto sa Jordan, ug ang ikaduha mao ang iyang pagbag-o sa iyang bayhon didto sa Bukid. Ang makatingala mao nga susama ang iyang mga pulong nga nag-ingon: “Kini ang akong pinalanggang Anak, Paminawa siya.” (v.5). Kining katapusang mga pulong sa Amahan, nagasugo kanato sa makusganong nga paagi. Ang pagpaminaw kang Jesus dili lamang sa atong dalunggan, apan usab sa atong kasingkasing ug kabubut-on nga epektibong magdala kanato sa hingpit ug walay konditisyon nga pagkamasunuron sa Dios.

Nabalitaan na nato nga ang katawhan karon adunay problema sa pagpaminaw, Ang klaro nga hinungdan mao ang pagkaladlad sa kusog nga saba ug musika sa palibot. Ang labing dautan, daghan sa katawhan dili buot nga maminaw. Buot nila nga magpuyo sa ilang kaugalingong gamay nga kalibutan, salamat sa makabag-ong high tech gadgets nga gisungsong sa ilang dalunggan, ug walay pagpakabana sa gawas sa kalibutan.

Ang dili pagpaminaw sa Dios ug sa iyang gipanudlo, magbunga sa seryosong kahimtang dili lang sa personal nga kinabuhi apan labaw sa tanan sa kinabuhi sa kalibutan. Ang pagkuyanap sa kultura sa kamatayon mao ang bunga sa dili pagpaminaw sa mga sugo sa Dios.Pananglitan, ang sugo sa “Dili ka manapaw”. Sa pagkakaron nahimong mahuyang ang sakramento sa kaminyoon ug sa pamilya, pinaagi sa diborsyo. Ang tulin nga pagdaghan sa nabuak nga pamilya, ug naglibog ug emotionally disturbed nga mga bata, ang pagdaghan sa sakita nga AIDS, mao ang pait nga mga bunga sa pag-abuso sa seks. Pananglitan ang sugo: “Dili ka mangawat”. Dagkung pagpangawat, korapsyon, pagpanglimbong, nahimong sistima sa gobyerno, sa dagkung negosyante o mga nangulong pinansyal nga institusyons. Ang krimen batok sa kinabuhi ug propriedad mao ang bunga sa kabus nga ekonomiya ug dili lig-on nga politika. Pananglitan ang sugo sa Dios nga: “Dili ka magpatay”. Sa daghang mga nasud, ang pagpatay nahimong legal ug gidawat sa daghang mga nasud—death penalty, euthanasia (pagpatay sa mga tigulang ug mga walay pulos ning kalibutan, sama sa mga masakiton) ug aborsyon. Matud pa sa Alan Guttmacher Institute, mokabat sa 115, ka libo ka mga bata matag adlaw ang giabort. Ilabi na ang katawhan nga adunay mentalidad sa kontraseptibo, ug ang aborsyon. Hangtud kanus-a nato ibalewala ug wala paminawa ang tingog sa Dios ug magpadayon sa paghimo ug dili mausab nga kadautan alang kanato ug sa tibuok kalibutan?

Gawas kon mobalik kita sa Dios, ang atong umaabot ngitngit kaayo ug makahahadlok. Ang langitnong tingog sa Amahan sa makausa pa: “Mao kini ang akong pinalanggang anak; Pamatia siya”. (v.5) Pamati kang Jesus! Namati ba kita karon?