Dili Mo Kami Itugyan sa Pagsulay

Unang Domingo sa Kuwaresma
Gn 2:7-9; 3:1-7 / Ps 51:3-4, 5-6, 12-13, 17 / Rom 5:12-19 or 5:12, 17-19 / Mt 4:1-11

Usa ka pari nadakpan sa trapic polis tungod sa kusog nga pagpadagan sa kotse. Samtang nagsulat ang polis sa iyang tiket, miingon ang pari: “Officer, pasayloa kami sa among mga sala,” mipahiyom ang polis ug miingon: “Padre, ayaw kami itugyan sa pagsulay.”

Diha sa sulat sa Hebrew 2:18, “Ug tungod kay nag-antos man siya ug gitintal, makatabang usab siya kanila nga gitintal”.

Ang pagsulay kabahin sa atong pagkahimugso ning kalibutan. Sa atong paglitok sa “Amahan Namo,” nangayo kita sa Amahan nga “dili kita itugyan sa pagsulay.” Wala kini magpasabot nga ang pagsulay gikan sa Amahan, busa man gani si Santiago miingon: “Kon ang usa ka tawo tintalon, dili siya angay nga moingon: ‘Kining tentasyon gikan sa Dios’ Kay ang Dios dili motintal kang bisan kinsa.” (Jas 1:13) Hinoon kini gikan sa kalibutan, sa tawo ug sa yawa.

Tinuod, ang hinungdan sa pagsulay, dili gikan sa Dios, apan gitugutan niya, matud pa sa Ebanghelyo: “Gidala si Jesus sa Espiritu Santo ngadto sa kamingawan aron sulayan sa yawa.” (Matt 4:1) Apan si Jesus nagmadaugon batok sa pagsulay ug kini nga kasinatian nag-andam kaniya sa iyang ministeryo nga publiko. Busa maghangyo kita sa Amahan nga dili kita itugyan sa pagsulay, puno sa kahibalo nga kita huyang ug dili sama kang Jesus nga dili madutlan sa pagsulay.

Unsa man ang pagsulay? Gitugot kanato sa Dios nga kita sulayan, aron mailhan nato ang atong kaugalingon, nga huyang ug nagkinahanglan gayud sa panabang sa Dios. Ang pagsulay nagpahinumdom kanato nga ang yawa labaw ka gamhanan kay kanato, busa kinahanglan gayud nga magpaubos ug magbantay kita sa kanunay. Ang pagpaduol nato sa Dios, maghatag kanato sa higayon nga maanaa kita sa kaayohan batok sa mga maigmat ug dautang yawa.

Ang pagsulay maghinlo usab sa atong mga intensyonis sama ra nga ang bulawan sunogon sa kalayo aron mahinlo. Ang bunga niini mao ang atong pagkamatinud-anon ngadto sa mga sugo sa Dios. Labaw sa tanan mao usab kini ang makapakusgan kanato sa pagbansay sa mga bili nga Kristohanon: sama sa pagpaubos, pagka-mabinantayon, pag-ampo, pagpailob, pagka-putli ug paghigugma. Sa giingon ni San Santiago: “Bulahan ang tawo nga mobarog taliwala sa mga pagtintal kay sa iyang pagdaog makadawat siya sa kinabuhi, ang ganti nga gisaad sa Dios alang niadtong nahigugma kaniya.” (Jas 1:12)

Ang mahinungdanon nga dili kita mangita sa pagsulay, kay kini moabot ra gayud, ilabi na kon kita anaa sa atong kaluya, kahuyang ug wala mabantayi nga mga panahon. Sa pagkatinuod, kon atong ibutang ang atong kaugalingon sa lit-ag sa pagsulay, mahimo na hinoon kini nga sala.

Busa, mahinungdanon nga mahibalo kita kon unsa ang mga pagsulay, aron makapangandam kita kon unsaon pagpakigbatok niini. Diha sa Ebanghelyo karong Domingoha, ang yawa nagpadayag sa tulo ka pagsulay. (Matt 4: 1-11). Ang una, nagpahimangno kanato batok sa materyalismo ug kahakog. Ang paggamit sa gahom alang sa kaugalingong problema o aron dili kita malisdan sa kinabuhi ug kalisod sa trabaho. Ang ikaduha nagpahamatngon kanato batok sa pagkamapahitas-on ug pagka pangandak. Ang labing makahuluganong paagi aron maato ang halangdong dignidad mao ang pagkamapaubsanon, ug kaputli sa kasingkasing, ug dili ang pagpasundayag sa atong mga talento, mga academic honors ug kalibutanong naangkon sa kinabuhi. Ang ikatulo nga pagsulay nagpahimangno kanato batok sa kinaugalingong nga ambisyon ug mainitong pangandoy sa pagpangita sa kaugalingong himaya, kay mao kini ang makatumpawak kanato sa dakung kalapasan nga pagtalikod nato sa Dios og atong simbahon ang mga butang nga materyal ug dili magdugay nga gahom. Busa miingon si Jesus: “Simbaha ang Ginoo nga imong Dios ug siya lamang ang alagari.”