National Bible Week gisaulog sa Parokya sa Sagrada Pamilya

Niadtong Enero 26 sa hapon didto sa bag-ong Social Hall, ang parokya sa Sagrada Pamilya naghimo og espesyal nga programa alang sa Bible Sunday Culmination uban sa tema nga, “The Bible Transforms and Unites the Nation.” Gidumala ang maong aktibidad sa BBS staff kauban ni Sister Aster Tumalip, ang program organizer. Ang maong kalihukan nagmalampuson sa panabang sa mga PSKB ug mga katekista sama nila ni Celesmar Bernadas, Auring Eso, Baby Miguel, Alma Amistad, Rose Senillo, Ef-Ef Cuenca, Jenevie Cuenca ug Randy Malimban.

Ang programa gilangkuban sa Bible input nga gihatag ni Dr. Annerose Villarba, gikan sa Formation Team ug gisundan sa Bible Quiz. Ang kalihukan gitambungan sa mga representante gikan sa nagkadaiyang ministriya kauban sa mga GKK Servant Leaders. Gikalipay ni Fr. Roger Duhaylungsod, DCD ug sa mga nanambong ang maong aktibidad tungod kay daghang pagtulun-an ang napupo mahitungod sa Bibliya. Gipanghinaot usab nga ang nahisulat sa Balaang Kasulatan, dili lamang mabansay ug mapuy-an matag bulan sa Enero apan padayon kini nga makita sa inadlaw-adlaw na pagkinabuhi. (Randy Malimban | LCCP/PSP HFP)