Bible reading marathon, gihimo sa unang higayon

Ang pundok sa mga nagkalain-laing kristohanon nga simbahan sa Davao ug kauban ang lokal nga panggamhanan nagkahiusa sa pagsaulog sa bulan sa Enero isip Bulan sa Bibliya uban sa tema nga Ang Bibliya makapa bag-o ug makapahiusa sa nasud.

Sa unang higayon sa Davao, ang maong kahilukan gitawag nga Bible Reading Marathon, ang Bibliya basahon gikan sa unang libro sa Genesis ug tapuson sa libro nga Pinadayag (73 ka libro). Basahon kini nga walay hunong nga gibana-ban nga mahuman sulod sa tulo ka adlaw.

Gisugdan ang maong kalihukan niadtong Enero 27, 2020 alas-otso sa buntag diha sa City Hall panahon sa Flag Raising ceremony. Gisugdan ang pagbasa pagkahuman sa pagbalaan (enthronement) sa Bibliya diha sa Rizal park alas-nuybe sa buntag ug matapos ang pagbasa niini nga walay hunong sa Enero 30, 2020.

Gihimo kini nga kalihukan aron masinati sa matag pundok nga Kristyano nga pwede isangyaw ang pulong sa Ginoo nga nagkahiusa ug dili lantugian ug lalisan.

Gihimo ang pagbasa niini pinaagi sa pagbahin ngadto sa upat ka pundok: ang Roman Catholic Church, National Council of Churches, Davao City Ministers Fellowship, ug Metro Davao Pastors Fellowship.

Gitagaan og tag unom ka oras ang matag pundok sa pagbasa sa Bibliya, ang unang tulo ka oras gihatag usab ngadto sa mga representative sa atong lokal nga panggamhanan. Gilauman nga kini mahimo matag tuig. (Domingo Alob | ABAD)