Asin ug kahayag sa kalibotan

Ikalimang Domingo sa Ordinaryong Panahon
Is 58:7-10 / Ps 112:4-5, 6-7, 8-9 / 1 Cor 2:1-5 / Mt 5:13-16

Duha ka importante kaayong mga butang o hagit ang gisaysay sa Ebanghelyo karon. Ang asin kinahanglan kaayo, kay makapalungtad kini sa pagkaon sama sa bulad o ginamos nga sud-an sa kabos. Makapalami pud kini sa pagkaon. Ang kahayag importante pud kay kung ngitngit ang palibot, mabangga kita ug lisud makaabot sa atong tuyo kay dili kita makaklaro sa atong adtoan.

Ang paghagit ni Kristo sa mga tinun-an ug kanatong tanan karon nga mahimong asin sa katawhan, mapakita nato kung kita nakapalami sa kinabuhi. Molami ang atong kinabuhi kung adunay pag-atiman sama sa gisulti sa unang pagbasa nga mopaambit ngadot sa mga gigutom. Dili ba ganahan kita nga makadawat og hinabang sa panahon nga walang-wala kita? Sama pananglit kung nasunogan o nalinogan o nabahaan kita, dili pa mogaan ang atong gibati kung adunay katilingban nga mahinumdom kanato ug motunol sa hinabang? Dili ba ganahan kita kung tul-id nga dalan ang gipuy-nato ug dili ang pagpakasala kay limpyo ang tatong konsensiya?

Ang paghagit ni Kristo sa mga tinun-an ug kanatong tanan karon nga mahimong kahayag sa katawhan mapakita usab nato kung kita nakahatag og pagpasabot sa mga butang nga wala nato hisabti. Sama sa gisulti sa ikaduhang pagabasa, ang misteryo sa gugma ni Kristo atong masabtan kung diha sa kayano sa kinaiya anaa ang pagpakita’g mapaubsanon ug maayong ehemplo nga dala sa gahom sa Espiritu Santo. Dili ba mas malipay kita ug makahatag og kahayag kung dili sa panghambog kondili sa simple ug mapaubsanon natong kinaiya matagad ang atong isigkatawo? Dili ba mas malamdagan kita kung ang pag-giya sa usa’g usa gipakita diha sa pagsubay sa simpleng butang sa kinabuhi ug dili sa komplikado ug dili makab-ot nga mga hisgutanan?

Sukad pa sa pagbuhat sa Dios sa matag usa kanato, ang matag tawo dunay katakos nga makahatag kahulogan sa kinabuhi. Timplahan ta ang atong palibot pinaagi sa pagpakita sa kaayo nga gitisok sa Dios kanato. Sindihan ta ang katilingban nga atong gipuy-an aron mohayag pinaagi sa mapaubsanon ug malipayon natong pagsinabtanay ug pag-alagaray kay kita ang asin ug kahayag sa katawhan.