ASAC mipahigayon og Sagop Kinabuhi Intensive Training Program

Ang Sagop Kinabuhi Program 2 (SKP2) nga usa sa mga programa sa Archdiocesan Social Action Center (ASAC) nipahigayon og Acceptance Ceremony sa siyam (9) nga mga gitawag og Persons in Recovery (PR) niadtong Enero 13, 2020 sa Our Lady of the Assumption Parish. Kini usa na usab ka laing ang-ang sa programa sa SKP2 nga gitawag og Sagop Kinabuhi Intensive Training Program. Gibanabana-an nga molungtad ang maong training sulod sa unom (6) hangtud sa pito (7) ka bulan gikan sa pagsugod niini.

Ang programa nagtumong nga: 1. Ma-ubanan ang mga PR sa ilang lakaw sa halawom nga pagsabot unsa kining adiksyon ug ang laing mga isyo nga adunay kalabutan niini; 2. Matabangan sila sa pag-establisar ug balik sa ilang relasyon sa Dios, sa ilang kaugalingon, sa ilang pamilya ug sa ubang mga tao nga adunay kalabutan sa ilang kinabuhi; 3. Mahatagan silag kahigayonan nga mahimong kabahin sa pagpakaylap sa programa sa SKP2; ug ang kalampusan niini 4. Makatabang sa katawhan nga maka-amgo nga possible diay ang recovery.

Pinangulohan sa among ASAC Director si Fr. Leonardo “Bong” Dublan, Jr. ang programa napahigayon gayod. Usa sa iyang panglantaw nga madugangan ang mga lumilihok sa SKP2 nga adunay halawon nga kasinatian bahin sa adiksyon. Pina-agi sa pagsalmot niining siyam ka mga PR nga tulo (3) gikan sa San Pablo Parish, usa (1) sa Our Lady of the Assumption Parish, usa (1) sa Our Lady of Perpetual Help Parish, usa (1) sa San Antonio de Padua Parish ug tulo (3) sa St. Francis Xavier Parish, gilantaw ni Fr. Bong nga mas maka Sagop pa kita ug daghang mga biktima ug mahimong pa unyang biktima niining adiksyon sa droga.

Ang tibook programa ipadagan sa pagtabang sa nagkalaing-laing volunteers nga naglangkob isip Treatment and Formation Team. Ubos sa pagmando ni Fr. Leonardo “Bong” Dublan, Jr. isip Program Director ang mga membro sa maong team mao kini:

Program Coordinator: Dennis T. Mabayao
Recovery Coach: Frederick Estoque
Retreat Master: Vicky Anghag uban sa mga madre sa TDM
Spiritual Directors: Fr. Bong Dublan, Fr. Hermie Garcia, Sr. Ma. Juliet Camacho, TDM
Social Workers: Cirila Lilibeth Panes, Daniel Salvador, Nancy Camporedondo, Grace Castigon, Ph.D
Counselor / Psychometrician: Demar Bangeles uban sa mga staff sa HCDC Guidance Office
Psychiatrist / Physician: Dr. Reagan Joseph Villanueva

Kabahin usab niining maong programa ang Community Extension Services sa Holy Cross of Davao College uban sa CES Coordinator nga si Mr. Lino Suñer. Apan si Fr. Bong mi-awhag sa mga magtotoo sa Davao nga adunay kahigayonan, nga mosuporta alang sa kalamposan niining maong program. Alang niadtong gusto motabang bisitaha ang among opisina sa ASAC sa 2nd floor Pastoral bldg., San Pedro Cathedral Compound, San Pedro St., Davao City.