Gisangkap sa Dios ang iyang gitawag

Ikatulo nga Domingo sa Ordinaryong Panahon
Is 8:23-9:3 / Ps 27:1, 4, 13-14 / 1 Cor 1:10-13, 17 / Mt 4:12-23

Gahapon, gisaulog nato ang Pagkakabig ni San Pablo. Kini paghandum sa iyang pagbag-o gikan sa pagkamaglulutos ni Kristo ngadto sa pagkamagsasangyaw sa Maayong Balita. Karong Adlawa, gisaulog nato ang Domingo sa Bibliya. Niining Bulan sa Bibliya, sa Enero karong tuiga, ang atong tema mao nga ang Bibliya makapabag-o ug makapahiusa sa nasud.

Sa atong Ebanghelyo, gisaysay ni San Mateo nga si Hesus didto na sa Capernaum aron magsangyaw nga ang kahayag miabot na. Iyang gipahimangnuan ang katawhan sa pagdawat sa kabag-ohan kay miabot na ang paghari sa Dios. Taliwala sa kasal-anan sa katawhan, iyang gipili ang mga tawo nga huyang nga gitawag niyang apostoles. Bisan sa ilang pagkulang ang Dios maoy nagpili kanila ug molig-on kanila aron magmantala sa kaluwasan sa Dios.

Kini ang estorya sa matag usa kanato. Kitang tanan gitawag sa Ginoo nga mahimong iyang mga saksi bisan pa man sa atong mga pagkulang. Walay hingpit nga ginikanan apan matag ginikanan gigasahan nga mamahimong ehemplo sa ilang mga anak. Walay perpekto nga pari og madre, apan matag pari o madre gisangkap sa Dios aron makasangyaw diha sa ilang paningkamot ug grasya sa Ginoo sa presensiya ug gugma sa Dios pinaagi sa ilang mga pulong ug buhat. Walay dili masipyat o makasala nga magtutudlo, o inhenyero, mag-uuma, doktor o politiko ug uban pa, apan sa iyang propesyon ang Dios nanalagnin aron siya makatabang sa uban.

Diha sa atong mga propesyon o trabaho, kita gitawag nga mahingpit ug mabag-o alang sa kahingpitan. Ang matag-adlaw natong pagmatinud-anon dalan nato sa kahingpitan taliwala sa atong pagkulang. Ang pagpamalandong nato sa pulong sa Dios bisan dili bulan sa Bibliya niining Enero, makapabag-o sa atong kaugalingong. Sa pamalandong ni Papa Francisco, giablihan sa Ginoon nga nabanahaw ang mga sa iyang mga tinun-an nga naglakaw uban kaniya padulong sa Emmaus.

Hinaut unta nga kita makaamgo sa kanunay nga tawag sa Ginoo. Wala kita niya gitawag tungod kay kita hitsas ug sangkap na, kondili, gitawag kita niya aron kita masangkap sa pag-alagad kaniya.