Kampanya sa Pasko Gasa Kay Kristo

Gusto nato nga ang umaabot nga Pasko puno sa hudyaka pinaagi sa mga party, apan daghan natong mga igsoon sa Visayas nag-antus sa kagutom ug kakulang sa desenting puy-anan.

Tungod sa ilang panginahanglan nga mga biktima sa bagyo, ang atong mahal nga Arsobispo Romulo G. Valles, pinaagi sa iyang sulat sirkular numero 38 nga gipagula niadtong Nobyembre 28, nag-awhag sa pagkanselar sa mga Christmas party aron tigumon na lamang ang magasto ug itabang kanila.

Sayod ang Obispo nga daghang mga sektor nga gobyerno ug pribado ang naghimo niini, busa siya nagdasig usab kanato isip simbahang lokal sa pagpadayag niining maong buhat sa gugma nga labaw pa sa kasakit nga dala sa mga kalamidad.

Pinangulohan sa Archdiocesan Social Action Center of Davao uban sa Direktor nga si Fr. Bong Dublan, gilunsad ang kampanya alang sa Pasko nga mao ang paghalad ug mga gasa sulod sa siyam ka adlaw nga misa de gallo alang kang Kristo pinaagi sa mga biktima sa bagyo.

Ang pagsaulog nato sa liturhiya dili mabulag sa kahimtang sa katawhan nga sama sa pagpakatawo sa Ginoo nag-ilaid sa kakabus ug kapobre. Puno gayod sa kalipay ang Pasko kung kita makahatag og gasa nga binalot nang daan alang sa nanginahanglan.