Ang Dios nagpaila kanato

Epiphany of the Lord
Is 60:1-6 / Ps 72:1-2, 7-8, 10-11, 12-13 / Eph 3:2-3a, 5-6 / Matt 2:1-12

Malipayong Pasko ug Mabungahong Bag-ong Tuig kaninyong tanan! Matag tuig niining panahona, dili nato ikalimod ang pinakanindot nga hulagway sa pagkatawo ni Hesus didto sa pasungan uban ni Maria ug Jose, ug lakip na pud ang ubang mga binuhat. Dunay pipila ka mga hulagway nga atong makita sa pasungan nga nagsimbolo sa mga importanteng mensahe panahon sa Pasko.

Una, ang bitoon nga maoy naglamdad sa mangitngit nga kagabhion. Kini nagpasabot nga bisan pa man sa kangitngit usahay sa atong kinabuhi, modan-ag ang Ginoo pinaagi sa iyang pagkatawo aron mogiya sa atong dalan. Sa mga kangitngit nga atong nasinati tungod sa hulga sa linog, lunop, kagubot ug ubang katalagman, ang Dios maghatag kahayag. Siya molamdag sa atong huna-huna nga mamaayo ang atong mga desisyon. Taliwala sa atong kabug-at, kahadlok, way kasigurohan, ang Dios nagpasalig nga siya uban kanato, mipuyo siya sa atong kalibutan aron pagluwas kanato.

Ikaduha, ang tulo ka mga hari o tawong maalamon nga gikan pa sa layong mga dapit. Kini nagpasabot nga walay layo sa presensiya sa Ginoo. Kung siya atong mailhan, dili kita magkwenta sa distansiya, sa kalisod sa mga hagit ug sa walay kasigurohan nga panaw padulong kaniya. Sayod ang tawong dunay pagtoo nga mahimamat niya ang Ginoo kung siya mosunod lamang sa giya sa kahayag sa iyang pulong ug tambag. Walay ilhon nga tribo, kaliwat, propesyo o estado sa kinabuhi ang Ginoo nga magpaila sa tanan ug walay gipili. Mahimong duol ang Dios sa mga tawong andam mohimamat kaniya.

Ikatulo, ang mga dagami. Taliwala sa baho nga pasungan nga dili gani angayan puy-an, ang Dios nagpakatawo. Kini nagpahimangno kanato nga bisan sa mga ngil-ad natong binuhatan ug kinaiya nga usahay dili matulon, ang Ginoo mopuyo uban kanato. Walay ngil-ad o baho o dili saon higustuhan nga makaikyas sa madawaton ug maunungon nga gugma sa Ginoo. Dili kita niya atrasan o biyaan bisan pa man dili humot ang atong kahimtang.

Kini ang pagpadayag sa Ginoo. Siya atong kahayag. Siya duol na kanato ug ato na siyang makab-ot. Siya mogakos kanato. Kini ang iyang pagpaila kanato.