Pangandam Nga Malipayon

Tungod ba kay nahitabo ang mga katalagman ug kalamidad sa atong palibot apektado ang atong pagpangandam sa pagsaulog sa Pagkatawo sa Ginoo? Tungod ba kay kulang ang atong “budget” sa mga palitonon niining maong panahon mawala ang kadasig sa atong pagsaulog panahon sa Pasko? Tungod ba kay gidasig kita sa dili paghimo og mga party aron motabang sa mga biktima sa kalamidad walay gana ang atong palibot?

Ang tawong nakasabot kinsa ug unsa ang angay nga disposisyon sa pagsaulog sa Pagkatawo sa Ginoo kanunay nga puno sa kalipay sa iyang pagpangandam, bisan gani sa ikaduha Niyang pagbalik. Si Juan nga Magbubunyag angay sundon sa Iyang taras taliwala sa pagsulay. Bisan tua siya sulod sa prisohan nakakita gihapon og kahayag ang sinugo sa Dios. Kini iyang gipamatud-an diha sa pagpadala niya sa iyang mga tinun-an aron sutaon kung si Hesukristo na ba gayod ang miabot kanila. Puno si Juan sa positibong panglantaw nga bisan siya gipriso, dunay rason nga siya malipay kay miabot na ang Mesiyas. Wala Siya magduhaduha nga ang Manluluwas mitungha na. Ang tuyo niya aron mangutana kinsa gayod si Hesukristo dili bunga sa pagkulang sa pagsalig, kondili bunga sa kaikag nga mahimamat ang gipaabot nga Bugtong Anak sa Dios. Tungod niini, giila siya ni Hesukristo nga wala pay tawo nga milabaw kang Juan nga Magbubunyag.

Mao usab unta kini ang atong kinaiya taliwala sa mga hagit sa panahon. Ang pagpailob ug pagpasensiya diha sa kalisod samtang kita magpaabot, nga bunga sa lig-ong kasing-kasing, sa pagpuyo nga walay reklamo sa bisan unsang kahimtang. Kini mao ang pagkinabuhi nga walay kahadlok ug walay kaluya tungod sa pagsalig nga mohari ang kahayag ug kalipay, ug mahanaw ang pagbangutan tungod sa pag-abot sa Manluluwas. Busa mga igsuon, palalom diha sa diwa sa Adbiyento, pangandam nga malipayon!