Ayaw kahadlok, moabot na ang Ginoo

Ika-upat na Domingo sa Adbiyento
Is 7:10-14 / Ps 24:1-2, 3-4, 5-6 / Rom 1:1-7 / Matt 1:18-24

Daghang mga kahadlok usahay ang atong mabati tungod sa mga balita ug panghitabo sa atong palibot. Resulta niadtong sunod-sunod nga linog niadtong Oktubre, daghan pang nahadlok nga basin mausab pa. Dunay kahadlok nga dala sa posibleng baha ug ubang kalamidad. Dunay nahadlok tungod sa mga kahimtang sa sakit o nagluya nga panglawas.

Karong Dominggoha, gilig-on sa Ginoo si Jose pinaagi sa damgo nga dawaton si Maria sa iyang banay tungod kay ang Espiritu Santo maoy nagpamabdos sa birhen. Kining tanan mahitabo aron matuman ang gitagna sa mga propeta nga maoy nadungog nato sa unang pagbasa. Gisaysay usab kini ni San Pablo sa ikaduhang pagbasa. Ang Ginoo mag-uban kanato. Ug si Jose misalig sa gisulti kaniya sa Dios pinaagi sa anghel.

Niining nagkaduol na ang paghandum nato sa pagkatawo sa Ginoo ug nagkalalom nga pagpangandam sa iyang sunod nga pag-anhi, nagpasulabi ba ang pagsalig nato sa iyang mga pulong? Midawat ba kita sa makaluwas nga plano sa Ginoo sa matag adlaw nato nga pagkinabuhi? Nakita ba nato ang iyang makanunayon ug matinud-anong tabang sa atong mga kabudlay? Nakapasalamat ba kita kaniya sa mga grasya nga atong nadawat?

Ang tawong misalig sa pulong sa Ginoo walay kahadlok. Iyang makita ang mga plano sa Dios nga nagakahitabo na sa iyang kasinatian bisan pa man sa mga pagsulay. Maghari kaniya ang padayon pag-alagad ug pagbuhat sa maayo aron siya makapahimuot sa Ginoo. Makanunayon siyang mag-ampo ug malipayon sa matag adlaw niyang pagpuyo. Makiglambigit siya nga mahinagpon sa isigkatawo uban sa pagtoo nga ang Dios anaa sa iyang matag binuhat. Matuohon siya sa grasya sa Dios sa kanunay uban sa pagsalig nga siya gipili ug gimahal sa Dios.

Busa, wad-on ta ang kahadlok kay hapit na moabot ang Ginoo nga magdala ug kaluwasan sa matag usa kanato.