Adunay Hulga sa pagtoo

Sa kadaghan sa mga nahitabong kalamidad sa mga milabay’ng bulan, dili ikalimod miatubang ang pagtoo sa panghulga.

Sumala ni Archbishop of Davao Romulo G. Valles sa Misa sa paghuman sa kasaulogan sa Tuig sa Pagtoo, November 23, naukay ang tibuok Pilipinas tungod sa mga kalamidad ilabi na sa milabay’ng Bagyong Yolanda nga maoy hinungdan nga nangamatay ang liboan ka mga tawo ug nawad-an og panginabuhi ang kadaghanan.
Dugang ni Abp. Valles, ang Bagyong Yolanda ang hinungdan nga mipakita ang katawhan sa Dabaw sa ilang paghigugma sa isig katawo.

“Kining tuiga maoy nakapabuhi sa ato kapasidad nga pagka-mahigugmaon,” sumala ni Abp. Valles sa iyang homiliya.

Sumala ni Abp. Valles bisan pa man sa mga miaging mga katalagman, susama sa mga layko nga mipaambit sa ilang tagsa-tagsa ka mga kasinatian binasi sa 12 Articles of Faith, ang pagtoo sa matag usa nagadala ngadto sa kahayag ug kalipay sa Diyos.

Giingon usab niya nga kabahin kini sa pagka-Kristiyano—ang pag-antus, kamatayon ug pagkabanhaw.
Ang Obispo sa Dabaw mipasalig nga sa mga panahon nga ang katawhan nakasinati og mga katalagman, si Birhen Maria anaa kanunay aron lig-onon ang pagtoo ug ipaduol ang tanan ngadto sa iyang anak.
Dugang niya nga nanghinaut siya nga silang mga kaobispohan, kaparian ug mga lideres maoy mag-atiman sa mga kabanay ug maka-dasig sa matag usa.

Gihimo ang pagtapos sa Tuig sa Pagtoo sa hapon sa Nobyembre 23, diin ang liturhiya ug pagbasa nga gigamit mao ang pagsaulog sa Christ the King. Mitambong sa maong kasaulogan ang mga layko sa 36 ka mga parokya sa Archdiocese of Davao kauban ang ilang mga kaparian.