Paglipay

Ikatulong Domingo sa Adbiyento
Is. 35:1-6a / Sal. 146:6-10 / San. 5:7-10 / Mt. 11:2-11

Paglipay! Mao kini ang singgit nato sa ikatulong Domingo sa Adbiyento. Kalipay ang nagpasulabi sa tawong mahinangpon nga nagpaabot sa iyang hinigugma. Kalipay maoy pagbati sa tawong nasayod nga mahiusa na siya sa nahigugma kaniya. Ang tinuod nga kalipay anaa sa pagtoo nga magkinaunsa man ang kinabuhi anaa ang Dios nga mag-uban kanato, Emmanuel, sa kanunay ug dili buta-bungol sa atong kahimtang.

Paglipay! Kini ang singgit ni Propeta Isayas sa unang pagbasa sa mga tawo nga naghandum sa pagtubo sa kalinaw ug kaangayan sa ilang palibot. Ang Dios mobalik aron paghatag kanato sa kadasig ug kaabtik ug dili sa kahadlok ug kaluya. Siya maglig-on sa atong mga kamot ug tuhod aron mobarog alang sa pagbuhat ug pagpaambit sa iyang kaayo nga iyang gasa kanato. Atong makita ug masangyaw ang tanang himaya niya aron atong mapalapnag ang iyang mahigugmaong presensiya.

Paglipay! Kini atong maangkon kung kita puno sa pasensiya sa pagdawat sa atong kahimtang nga nagpaabot sa pag-ani. Ang pagpasensiya maoy maghatod kanato sa lawom nga kalipay uban sa pagsalig nga ang tanang pag-antos nato mahupay, ang matag buhat nato mahatagan sa ganti ug dili mahukman. Kining maong pasensiya nga gihisgutan sa ikaduhang pagbasa maoy tinubdan sa kalipay nga masaligon sa pag-abot sa Ginoo.

Paglipay! Kini ang hagit sa mga tinun-an ni Juan ug kanatong tanan diha sa Ebanghelyo. Kining kalipay dala sa atong pagkakita sa mga maayong hitabo sa atong palibot. Tailiwala sa kasakit tungod sa mga katalagman sama sa linog, taliwala sa mga sakit sa panglawas nga nasinati sa atong mga igsuon nga anaa sa mga hospital ug ilang panimalay, ug taliwala sa ubang mga kagubot sa atong pagpuyo, ang Dios nagpadala ug instrumento sa kaayohan sa lawas ug kalag. Ang Ginoo nagtudlo kanato sa pagtampo sa unsay atong matabang sa mga biktima sa katalagman. Siya nagluwas kanato sa mga peligro. Sa daghang mga maayon hitabo sa atong palibot, dili ba diay kini hinungdan aron kita maglipay. Busa igsuon, paglipay kay moabot na ang Ginoo aro pagluwas kanato!